AlexisOctP.txt

#META#  TextURI         :: AlexisOctP
#META#  DEAF            :: http://www.deaf-page.de/fr/bibl/bib99a.php#AlexisOctP
#META#  TL              :: SAlex. R
#META#  FEW        	
#META#  ARLIMA          :: https://www.arlima.net/no/114
#META#  Author           
#META#  AuthorBorn      
#META#	AuthorBornAmb	  
#META#  AuthorDied      
#META#	AuthorDiedAmb	  
#META#	AuthorFl1	      
#META#	AuthorFl2	      
#META#  TextTitle       :: La vie de saint Alexi en vers octosyllabiques
#META#  TextSubtitle  	
#META#  TextVols        :: 1
#META#  TextSubj        :: hagiography
#META#	TextDom	        
#META#	Translation	    
#META#	Collection	    
#META#	CollectionNo	  
#META#  TextDescARL     :: vers octosyllabiques à rimes plates
#META#  TextDescVers    :: 8
#META#  TextDateARL     :: début du XIIIe siècle
#META#  TextDateAdj     :: d13
#META#	TextDateMin	    
#META#	TextDateMax	    
#META#  EdEditor        :: Paris, Gaston
#META#  EdPlace         :: Paris
#META#  EdPublisher     :: Romania
#META#  EdVol           :: 8:30
#META#  EdYear          :: 1879
#META#  EdPages         :: 163-180
#META#  MsBase          :: BnF fr 25408
#META#  MsOther         
#META#  MsNum           :: 1
#META#	MsDateARL	      
#META#	MsDateAdj	      
#META#	Form	          :: v
#META#	Complete  	    :: true
#META#	NoWords	        :: 5461
#META#	NoLines	        :: 964
#META#	DialAuth	      
#META#	DialScribe	    
#META#  ScanURL         :: http://www.persee.fr/doc/roma_0035-8029_1879_num_8_30_6463
#META#  ScanURIOther  	
#META#  ArkID           
#META#  LccnID          
#META#  OclcID          
#META#  WebAuthor       :: David Joseph Wrisley
#META#  ORCIDWebAuthor  :: orcid.org/0000-0002-0355-1487
#META#  WebReviewer     
#META#  ORCIDReviewer   
#META#  MiscInfo        
#META#  CCLicense       :: CC BY-NC-SA 4.0 International


*** START
Folio30a
PageV01P169
§Ici commence le prologue en la vie saint Alexi.
Bone parrole boen leu tient;
Et cil qui l’ot et la retient
Et met a ovre fet que sage;
Et cil ne fet pas son demage
Qui la dit, enceis fet son preu
Vers Deu, qui en tens et en leu
Li merira, ge n’en dout rien:
Kar il guerredone tot bien.
Por ce m’es pris talant de dire
Un conte de bone matire
Por crestiens edifier,
Et pour ce que il m’est mestier
Que bone parole me tienge
Boen leu vers Deu, qui me meintienge
En son servise, et tel me face
Que je le veie face a face
§Or commence la vie saint Alexi.
Folio30b
Jadis avint, ce dit l’estoiere,
Que dui frère, Archade et Honoire,
Furent emperére de Rome
Ensemble ; en lor tens out un home
En la cité, boen crestien,
Ki aveit non Eufemien:
PageV01P170
Riches hom ert de grant noblece,
De grant poer, de grant hautece;
C'ert le plus haut por verité
De la cort et de la cité.
Mes por ce ne lessot il mie
Ke i ne fust de bone vie,
K’il ameit Deu et sainte iglise,
Et quanqu’apent a son servise.
Il ert home de boen afere,
Douz et creable et debenere,
Et aumoniers et charitables:
Folio30c
Treis feiz le jor erent les tables
Aparrelées richement
En son ostel a povre gent,
Aus vueves et aus orfelins,
Aus trespassanz, aus pelerins,
A ceus qui mestier en aveient,
Et qui por Deu le requereient.
Et quant c’ert que mengier voleit,
A none, si comme il soleit,
Menjout; mès son mengier n’ert pas
Farsi de chufles ne de gas,
De bordes ne de lecheries,
De guerseiz ne de gloutonnies;
Eins aveit en sa conpaignie
Prodesomes de sainte vie,
Qui de chufleis n’aveient cure.
Einzceis parloient d'escriture,
De Deu, d’edificacion,
De sens et de religion,
Del preu et del salu de l’ame.
Tel ert li sires; et la dame,
Ki Aglaes aveit a non,
Ne valeit pas meins, se meuz non,
Que si sires en sun endreit:
Kar ele amoit Deu et cremoit,
Et se peneit de lui servir
A son gré et a sun plesir;
Ne fu fole ne jangleresse,
Ne baulande ne beverresse
Folio30d
Ne felonnesse n’orguellose;
Einz ert sainte et relegiose,
Et debenere et aumosniére,
Et vaillant en tote maniére
Sanz vilanie et sanz meffet.
Mès moult érent en grant dehet
Andui qu’il n’aveient nul heir,
Qui fust sire de lor aveir;
Si érent en aflictions,
En jeunes, en oreisons
Vers nostre seignor Jhesu Crist
Qu'il lor donast, et il si fist:
Un fiz orent, k’il apelérent
Alexi; Deu en merciérent
Qui lor preire aveit oie,
Et pramistrent que chaste vie
Tendreient d’ilec en avant
A toz les jors de lor vivant.
Li enfes crut et amenda,
Tant que sis péres kemanda
Et vout qu’il fust a letres mis;
Et il s’est d’aprendre entremis
Comme soutil et de boen sens,
Si bien qu’il fu en poi de tens
De plusors arz preuz et vallanz,
Et sages et bien responnanz.
Folio31a
Mès en la divine escriture
Out plus mis s’entente et sa cure:
Il i penseit et nuit et jor;
C’ert s’estuide, c’ert son labor,
Son solaz et s’enveiseure.
D’autre deduit n’aveit il cure,
Kar il aveit trové sanz faille
Illec le grein desoz la paille;
Et par le taster de cel fruit
Saveit il que tot le deduit
De cest siecle, por verité,
N’est fors folie et vanité,
Et qui plus i met son corage,
Plus fet son duel et son demage;
Kar s’il i a rien qui bien plese
Perdre I’estuet a grant mesese
Ou a la vie ou a la mort,
Sanz recovrier et sanz confort;
Kar quant plus est la chose amée,
Plus est griéve la desevrée,
Et plus dolorose la perte.
Por itel vanité aperte
Et por meinte autre aveit issi
Le siecle adossé Alexi
PageV01P170
Et doné a Deu tot son cuer,
N’il n’en fust parti a nul fuer;
Mès son pére, qui mout l'amot,
Tot autrement de lui pensot.
Folio31b
Kar quant il le vit en aage,
Femme li quist de grant parage.
K’en diroie plus? Le jor vint
K’esposer fame li covint;
N’i osa metre nul contenz
Por son pére et por ses parenz;
Mès en son cuer out grand tempeste.
Et par dehors esteit la feste
Grant et planiére et gloriouse,
Si enveisie et si joiouse
Come il coveneit a teus genz:
Mout i out divers estrumenz,
Gigues et harpes et vieles,
Dames et vaillez et puceles,
Cendaus et pailes et samiz,
Tanz embrasemenz de deliz
Et alumalles de luxure,
Des geus et de l’enveiseure,
Des sonez et des meloudies
Dont les noces érent farsies,
Ke bien poez saveir sanz faille
Que mout out en son cuer bataille,
Et grant loier de la victoire
Qui por Deu refusa tel gloire.
Li jor trespassa ; la nuit vint:
A lor let aler les covint;
Si fu menée l’esposée
En une chambre encortinée
Et parée de dras de seie,
Folio31c
Si cointement comme a tel joie
Covient, et a si hautes genz.
Et quant il orent la dedenz
Trestot lor afere atorné,
Li vaillet n’a pas sejorné
Mout longuement; einceis ala
Après, et en la chambre entra,
Et fist la costume et l’usage
Del pais et de mariage :
A tant s’en partent et s’en vont
Cil qui plus a fere n’i unt,
Et il remestrent sol andui,
Sans conpaignie de nului.
Quant il furent privéement
Tot sol a sol, primiérement
Commence a parler Alexi:
"Dame," fet il, "ore est issi:
Dex qui tot a fet et crié
Nos a ensemble marié.
Por ce si est dreit, ce me semble,
Ke nos aiun amor ensemble.
Et porton leauté et fei
Et je a vos, et vos a mei;
Et nostre amor seit si planiére
Qu’el seit et veraie et entière."
"Sire," ce respont la pucele,
"Vos dites reson bone et bele,
Folio31d
Et j’en ai bone volenté.
Vostre amor et vostre bon gré
Voudreie je mout deservir,
Et j’ai talent de vos servir
Et amer et porter ennor
Comme a ami et a seignor;
Et moult me plest itel maniére
D’amor qui seit veire et entiére,
Si com j’entent vostre devise.
Et j’en vérité, sanz feintise,
Vos aim issi entiérement,
Bien le sachiez certeinement:
Ker ja home n’i partira;
Tote m’avra cil qui m’avra;
Dex me gart de tel vilanie
Ke je face a nului partie
Ne de mon cors ne de mon cuer."
"Vos dites mout bien, bele suer,"
Fet il ; "c’est droite amor charnel
De mariage; mès por el
Le dis que vos n’entendez mie.
Qui bien vuelt a une partie
De mon cors, et a autre mal,
Est ce amor entiére? nenal;
N’amor veraie n’est ce mie
S’ele veut mal ne vilanie;
N’el n'est ne veraie ne sage
S’el veut por bien mal et demage.
Folio32a
Tel est amor luxuriose,
Dont la fin est mout dolerose;
PageV01P172
Et je vos di tot ensement:
Se vos m’amez entiérement,
205 Amez m’ame et mon cors ensemble.
Et si devez vos, ce me semble,
Mieuz amer m’ame, qui mieuz vaut,
Que j’aim mout mieuz, se Dex me saut,
En moi et en vos un des euz
Que je ne faz un des orteuz.
Amon nos donc, ma douce amie,
Sanz pechié et sanz vilanie.
Quer autre amor n’est fors haingne."
"Comment!" dist, "sire," la meschine,
"Est donkes pechié mariage?"
"Nenil," fet il, "mès cil est sage
Qui let cel bien por un graignor.
Virginité est mont meillor;
Et a mont haute gloire vient
Qui bien l’enprent et bien la tient.
Ensorquetot mont doit douter
Home qui tent a soi sauver
Le grand peril et le fort laz
Qui si est près de cel solaz
Come il couvient a mari fere;
Et se il veut al monde plere,
Folio32b
Il encort mont d’autres pechiez
Dont touz li monz est entechiez.
Si fet que saige li poisson
Qui fuit le verm por l’ameçon,
Ker trop i a chiére golée,
Povre et petite, et tost alée.
N’est pas donc sages marcheanz,
Einceis est fol et mescheanz
Qui si chier achate tel chose
Dont si tost vient a la parclose.
Qui voudreit a Deu barkennier,
Qui nulhui ne veut enginnier,
Mout porreit grant ennor conquerre:
II done le ciel por la terre,
Il done le grein por la palle.
Est il marchié qui cestui vaille?
Or puet l’en bien dire a dreiture
Que cest marchié est troveure.
Ore esgardez de chief en chief
A quel dolor, a quel meschief
Hom nest et vit et tret a fin,
Tot comme nue de matin :
Il est conceuz en ordure,
Et nest a grant malaventure,
Et vit en peinne et en labor,
Et muert d’angoisse et de dolor.
Toz devun treu a la mort
Folio32c
Et ariveron a son port,
Et passeron parmi sa porte:
N’i a si fort qui li estorte,
Que le plus fort et le plus sain
A ele tost mis en son sain.
Nus n’a por or ne por argent
D’ele treves ne tensement;
La mort tret de l’arc qui ne faut;
El n’esparne ne bas ne haut,
Einz met tote gent en un conte,
Et povre et riche, et rei et conte,
Et fol et sage, et mal et boen,
Et le chalenge tot por soen.
Que vaut donc beauté et richece,
Force, puissance, gentillece,
Beaus solaz, et joie, et deduit,
Quant mort tot abat et destruit?
Quanque l’en a toz jorz bracié
Et laboré et porchacié,
Et escreu et essaucié,
A ele a un cop crabacié
Et fet revenir a neent,
Et esvanoir comme vent,
Et defire comme fumée.
Por ce a non li mont "fol i bée,"
Et santé d’ome "fol s’i fie,"
Et sa joie "chace folie."
Folio32d
Dahez ait fruit qui ne meure,
Et folie qui toz jorz dure."
Issi a sa fame parla,
Mès ne dist pas quanqu’il pensa.
Et quant asez out sarmoné,
Un anel d’or li a doné,
Comme a sa douce chiére amie.
Et li encharche et dit et prie
Que por l’amor de lui le gart.
A tant d’ele par nuit s’en part
PageV01P173
Si coiement c’onques ne sout
Home ne fame ou il alout.
Et a pris ove sei de soen
Tant con li plout et sembla boen,
Et s’en est issu, por Deu querre,
De son pais et de sa terre.
A la mer vint ; outre passa
En une nef que il trova.
Lores a sa veie aquellie
Parmé la tere de Sulie;
Et erra tant par ses jornées,
Par monteignes et par valées,
Que il ne fine ne ne cesse
Devant que il vint a Edesse,
Une cité bien renomée
Qui ore est Rohès apelée.
Ilec a sa robe changée
Folio33a
Por une viez et depecée,
Et a doné a povre gent
Ce qu’il aveit d’or et d'argent,
Et departi si quanque il out
C’onques riens retenir n’en vout;
Ainz s’en fist por Deu si delivre
Qu’il le covint d’aumones vivre.
Mout furent dolent au matin
Tuit li parent et li veisin,
Quant il fut seu qu’Alexi
Les aveit deguerpiz issi.
Les baesses et les serjanz
En firent duel et plaintes granz,
Mès sor toz le pére et la mére:
Mout fu lor contenance amére,
Triste et plaintive et gaimentose.
"Lasse, cheitive, dolorose,"
Fet la mére, "que devendré?
Ou est mon fiz? ou le kerré ?
Je morreie orendreit mon vuel;
Quer jamès jor n’istrai de duel,
D’angoisse ne d’aflictiun,
De plor, de tribulaciun,
Devant que je sache novele
De mon bel fiz." Et la pucele,
Qu’il aveit novel esposée,
Folio33b
Est durement adolosée,
Et plaint, et plore, et dit et jure
Que jamès, por nulle aventure,
Autre seignor de lui n’avra:
Que qu’il demort el l’atendra.
Eufemien fet duel mout grant,
Comme pére de tel enfant,
Et enveia por son fiz querre
De ses serjanz parmi la terre,
Et ça et la, et Ioinz et près.
Li uns passérent par Rohès;
Mès Alexi pas ne trovérent;
Sil virent il, et li donérent
De lor aumones, qu’il requist
Tot porpenseément et prist
D’eus por ce qu’il les quenut bien,
Mes il nel quenurent de rien
Por ce qu’il ert mal atorné.
Si s’en sunt sanz lui retorné.
Quant Alexi a ce veu
Qu’il ne l’ont pas aperceu
Ne requeneu n’avisé,
Por ce qu’il ert si desguisé,
Megres et pales et despit,
En povre estat, en mal abit,
N’est mie qu’il n’eust pitié
De ce qu'il est issi changié
De sa terre et de son pais,
Folio33c
De sa fame et de ses amis;
Mès liez en fu d’autre partie,
S'en aore Deu et mercie,
Por qui amor muez esteit,
Si que nus nel requenoisseit.
Alexi a grant mesestance
Del cors feseit la penitance,
En jeunes, en oreisons,
En veilles, en afflictions;
Et, de tant poi com il aveit
D’aumones que l’en li doneit,
Mout volentiers et doucement
En reparteit a povre gent;
Por orer et por le servise
Deu oir hantot mout l’iglise
Nostre dame sainte Marie,
Tant que Dex, qui n’oblie mie
Ses boens amis et ses serjanz
En la fin de des et set anz
PageV01P174
Demonstra queus home il esteit.
A l’uis del mostier se seeit
Un jor: tel esteit son usage;
Lores plout a Deu que l’image
Nostre dame parla, et dist
Au segreistein que il queist
L’ome Deu, et l'apelast enz.
Folio33d
Li segreistain ne fu pas lenz,
Einz essi hors, si baata,
Mès nel quenut ne nel trova;
Lors retorna et preia Deu
Qu’il li enseignast en quel leu
Et queus il ert, qu’il n’i fausist.
Lors reparla l’image, et dist:
"Li povres hom qui a l’uis siet,
C’est cil qui a Deu plest et siet.
C’est cil qui a Deu atalente,
Kar il le sert o boenne entente."
Atant li segreitein s’esmut,
Et vint a lui et le quenut
Si li chai a piez et dist:
"Sire, merci: por Jhesu Crist
Le fiz Deu vos pri et requier
Ke vos entreiz en cest mostier,
Et fetes a vostre devise
Quanque vos plera en l’iglise;
Ker il plest a Deu et a nos."
Cil qui fu simples et hontos
En out la face aukes vermelle;
Et li pueples en out mervelle
Qui ce ont oi et veu:
Por ce l’ont puis bien queneu,
Et l’enorérent et chiérirent
Tuit cil qui parler en oirent.
Cil qui le monde entiérement
Out, por plere a Deu solement,
Folio34a
Adossé, quant il vit l’enor
Qu’en li feseit, out grant poor
Ke vaine gloire et vanité
Ne li tousist humilité,
Sanz qui tot est ypocrisie
Quanqu’apartient a sainte vie.
Por si grant peril eschiver,
Por ce que fort est l’estriver,
Qu’il est soutil et souduiant,
Par nuit s’en est torné fuiant
Dreit a la mer, et dist qu’ireit
A Tarse, se Dex le voleit:
C’est la vile dont saint Pol fu
Et quant il sereit la venu
Il i sejorreit tot adès,
Cum il aveit fet a Rohès,
En l’iglise saint Pol de Tarse,
Qui n’ert ne povre ne escharse.
Por la aler sus mer monta;
Mès un vent la nef desvoia
Et chaça tant qu’a la parsomme
Est arivée au port de Rome.
Quant Alexi veit le pais
Et quenoist dont il est nais,
Ce peise lui; mès plus n’en puet,
Quer fort jose est " fere l’estuet ".
Folio34b
Lors se porpense ensei et dit:
"Quant il plest au saint esperit
Ke j’en la terre ou je fui nez
Sui en tel maniére arivez
Contre mon cuer, g’irai a Rome;
Ne ja ne requerré nul home
D’ostel, fors solement mon pére;
Quer je ne cuit pas que j’apére
N’a ma color n’a mon semblant
Que j’onkes fusse son effant."
Issi le dist; lors s’en torna.
A Rome vint, et encontra,
Si comme Dex le vout, son pére
Qui de la cort a l’emperére
A son ostei s’en retorneit,
Et grant plenté o sei meneit
De conpaignons et de serjanz,
Comme haut home et bien puissanz.
Alexi s’avance vers lui:
"Sire," fet il, " por Deu, je sui
Un povres hom qui ai mestier
Ke l’en me doigie a mengier;
Si vos requier par cherité,
Por Deu qui maint en trinité,
Qui de mal vos gart et deffende,
Et vostre fiz uncor vos rende
PageV01P175
Vif et sain et sauf et hetié,
Folio34c
Que vos aiez de mei pitié,
Et me doingiez ma garison
De voz aumones en meson."
Eufemien bien l’escouta;
D’Alexi son fiz li menbra,
Dont grant tendror au cuer li prist.
Un serjant apela, et dist:
"Meinne cest home a mon ostel;
Garde qu’il n’ait ne d’un ne d’el
Besoig, soufrete, ne mesese,
Ne nule rien qui li desplese,
Ne moleste ne nule rien.
Ce te commant je mout trés bien;
Ainz fai vers lui quanqu’il voudra
Et quanque mestier li sera."
"Sire," respont cil, "je l’otrei."
Lors l’en mainne a l’ostel o sei,
Si li enseigne et leu et place
Ou il gise et menjust, et face
Sa volenté et tot son boen,
Ausi comme se tot fust soen.
Tant comme Alexi fu novel
Fu il ostelez bien et bel;
Mès quant l’en s’ennuia de lui,
Mout trova qui li fist ennui.
Garchonnalle, male mesnie,
Mout mal duite et mal enseignie,
Folio34d
Dont ces riches osteus sunt plains,
Qui sunt enrievres et vilains
Et porvers et de mal afere,
Lau il osent et puent fere;
Et qui plus est vers eus soufrables
Et eus plus fous et encreables;
Qui ne se claime ne deffent
Cel folent il seurement.
S’eus trovent home simple et mol,
Il en geuent au chapifol,
Et li font honte et vilanie,
Que li seignor ne sévent mie
Toz les meffez de lor ostel,
Por ce qu’il entendent a el.
Ç’avient sovent; et lot issi
Aveneit il a Alexi:
Mout deboté fu et lediz,
Et ramponez et escharniz,
Tant que neis les laveures
Des poz et chureaus et ordures
Sor son chief li meteient il;
Mout le teneient cort et vil
Et feseient mal a foison.
Mès il beveit tot por poison,
Quer poison esteit ce sanz dote;
Qu’ausi con l’en garist de gote
Ou d’autre mal par poison beivre,
Folio35a
Tot autresi qui veut receivre
Aversité en penitance
Humblement et en pacience,
II garist s’ame de pechié,
S’en a Deu merci et pitié.
Mout se dist veir saint Pol qui dist:
Quicunques selon Jhesu Crist
Veut vivre o boenne intenciun,
Il avra persecuciun;
Ker qui plus est religios,
Et plus li est contralios
Cil qui deçut par une pome
Eve et Adam le primier home,
Et qui toz veut a male fin
Treire par force et par engin:
Por ce assaut en meinte guise,
Ker meinte feiz par coveitisse
Des delez charnaus l’escommuet;
Et quant il veit que il nel puet
Veintre par coveitise d’ese,
Si li fet dolor et mesese,
Ou par lui ou par ses serjanz
Dont mout est, c’est demage granz.
Il veit que Alexi esteit
Chés son pére, et lez lui aveit
Biens terriens a grant plenté,
Dont il feist sa volenté
Folio35b
Se il vousist changier sa vie;
Dont il aveit duel et envie,
Que il ne poeit pas tant fere
Qu'il le peust a ce atrere;
Sis entiçout encontre lui
Et li feseit asez ennui
Que par angoise ou par destrece
S’en reperast a sa richece
Et sa sainte vie chanchast,
Ou seveaus non qu’il s’en vengast.
PageV01P176
Isint est quant aucuns estrive
Boter desor l’or de la rive
Un autre en l’eve, s’il ne puet,
Si s’en aire et escommuet
Et le fiert de pié et de poig
Qu’il salle en l’eve par besoig
Ou seveaus qu’il s’en seit vengié
Tant qu’il s’en tienge a bien paié.
Alexi, qui ce bien saveit,
Comme cil qui grant sens aveit,
Soufreit mout debenerement,
Comme aignel simple et innocent,
La vilennie et le despit,
Sanz meffet et sanz contredit,
Sans contençon et sans clamor
Fere n’a dame n’a seignor,
Et plus esteit d’eus corouciez,
Folio35c
Que deable aveit si soz piez
Qu’il en feseit son estrument,
Qu’il n’ert de son avilement,
De son mal ne de son hontage:
Quer c’ert son preu et lor demage,
Et en atendeit grant corone
De Deu qui les biens guerredone.
Autres dis et set anz vesqui
Enz la meson son pére issi;
Et quant il senti près sa fin,
Il a demandé parchemin
Et enque a cil qui le gardout,
Si li aporte; quant il l'out,
Il i escrit tote sa vie,
Si comme vos l’avet oie,
Et escrit tot de chief en chief
La mesestance et le meschief
Et les maus dont ill out adès,
Et chés son père et a Rohès.
Devant ce qu’il dut trespaser
Vout Dex son tresor encuser,
Et dist une voiz en l’iglise
Au poeple qui ert au servise:
"Alez, si querez le saint home,
Qu’il pret por la cité de Rome!
Ker il est si près de sa fin
Qu’il trespasera le matin."
Folio35d
De cele voiz qui fu oie
Fu tote la gent esbahie,
Et la novele tost seue
Par la cité et espandue.
Mès ne saveient en quel terre
II deussent tel homme querre:
Quistrent le, mès pas nel trovérent.
Pour ce par matin asemblérent
Le vendredi communement
A l’iglise. Pape Innocent
I fu, et li dui enperére
Archade et Honoire son frére,
Et mout grant plenté d’autre gent;
Et preiérent devotement
Deu qui lor enseignast ou esteit
Cil qui querre lor kemandeit.
Par la volenté Jhesu Christ
Revint une voiz et lor dist :
"En la meson Eufemien
Trovereiz le saint crestien. "
De la voiz qu’ill orent oi.
Mervellosement esjoi
Furent tuit, et grant et petit.
Lors ont a Eufemien dit :
"Sire," font il, "qu’avez vos fet?
Certes mout nos avez meffet
Folio36a
Qui tel tresor avez celé."
"Non ai," fet il, "por verité
Le sachiez; ainzceis vos di bien
Que uncore n’en sai je rien."
Lors apele et met a reson
Le seneschal de sa meson:
"Sez tu," fet il, "nul home itel
Que tu oz ci en mon ostel?"
"Certes," sire, fet il, "je non."
"Alon i donc; et si sachon,"
Fet pape Innocent. "Volentiers!"
Lors va devant tot li primiers
Eufemien por atorner
L’ostel qu’il n’i ait qu’amender
A receveir si haute gent.
Atant evos isnelement
Le vallet qui en garde aveit
Alexi tant comme il viveit:
PageV01P177
"Sire," fet il, "pernez vos garde
Se ce fust cil que j’ai en garde;
Ker je sai bien, je n’en dot mie,
Qu’il esteit mout de sainte vie,
Et aveit mout por verité
Pacience et humilité,
Et mout feseit grant penitance
De jeunes et d’austinance,
Et mout esteit en oreison
Et a l’iglise et en meson."
Folio36b
Eufemien cele part vet:
Mort le treuve; vers lui se tret,
Si le descovre et veit sa face
Qui semblout clére comme glace,
Si con Dex l'out enluminée
Quant sa vie fu terminée.
Tant l’esgarde qu’il aperceit
Le parchemin que il teneit.
Il s’abessa ; prendre le vout,
Mès unkes aveir ne le pout.
Lors vient ariére isnelement,
Et a dit a pape Innocent
Et as autres : "Trové avun
L’omme Deu que nos queriun."
Lores lor conte de sa vie
Comme il l'out du vallet oie,
Et del parchemin qu’il teneit
Qu’il vout prendre, mès ne poeit.
Parlant les a issi menez
Au cors; ilec sont asemblez
Et font o grant devociun
Devant lui lor estaciun.
Son cors et sa face et sa chiére
Esgardent en meinte maniére,
Et le parchemin que il tint.
Pape Innocent près de lui vint
Et a pris l’escrit en sa main,
Folio36c
Et le baille a son chapelein.
Cil lut l'escrit en audience,
Et li autre tindrent silence.
Quant Eufemien l’entendi,
Par poi le cuer ne li fendi:
D’angoisse et de duel que il ot
Ne pout unkes parler un mot;
Le cuer li tremble et refreidist,
Il pert la color et palist;
Pasmé s’est et esvanoiz;
Ker le sanc est au cuer foiz.
Quant il revint de pasmeison
En son sens et en sa reison,
Il cort a son fiz, si l’enbrace,
Bese li la bouche et la face,
Les euz, le front, sanz dire mot;
Et quant ce fu que parler pot,
II se commence a doloser,
Et a pleindre et a regreter
Alexi si pitosement
Qu’il feseit mal a tote gent :
"Alas," fet il, "alas, cheitif!
C’est grant dolor que je tant vif.
Ker la meie vie ne dure
Fors por aveir malaventure
Et dolor dès ore en avant
A toz les jorz de mon vivant.
Folio36d
"Alexi, beu fiz Alexi,
Por quei m’avez vos si trahi
Que vos tanz maus avez eu
Si près de mei sanz mon seu,
Et si lonc tens? unkes nel soi,
Ne requenoistre ne vos poi.
Souffert avez tantes injures,
Tanz hontages, tantes leidures
De vos garçons demeinement!
Si ne vos failleit solement
Fors parler et vos descouvrir
A aveir tot vostre plesir.
"Je cuidai, quant vos fustes né,
Beau fiz, que Dex m’eust doné
Force et aide en ma flebece,
Et sostenance en ma viellece,
Et ballif et seignor et eir
De mon or et de mon aveir.
Mès Dex m’a si dessesperé,
Desconfit et desbareté
La mort vers qui nus n’a deffense!
Mout remaint de ce que fol pense!
"Beau fiz, se vos fussiez ocis
En batalle, ce m’est avis,
Por ce que ç’avient corsaument
J’en fusse plus legiérement
Et confortez et apaiez.
Folio37a
Mès j’esgart que vos estiez
PageV01P178
En mon ostel et en ma garde;
Si estes mort par ma mesgarde,
Quer ne fis pas ce que je dui:
Vers est, si quenois que j’en sui
Mout copable de vostre mort,
Et vos veir de mon desconfort
lestes copable sans dotance,
Quer saviez la grant pesance
Et saviez le grant torment
Que j’aveie por vos sovent;
Et veiez la lede hére
Et de mei et de vostre mére,
N’onques ne vos en prist pitié;
Vos feistes veir grant pechié,
Ker mout tost, se vos vousisiez,
En grant joie nos meissiez.
"Bel douz fiz, je vos ai fet querre
Et cercher par mer et par terre,
N’onques noveles n’en oi.
Or vos ai trové mort ici ;
Je ment: trové ne ai ge mie,
Que j’ai trové le cors sanz vie :
Trover mort n’est pas troveure,
Mès perte dolerose et dure;
J’ai donc perdu, non pas trové,
Mon fiz que j’aveie adiré.
" Alexi, beu fiz Alexi,
Folio37b
Vos ai je donc perdu issi?
Oil veir, je ne m’en puis tere,
Seveaus quant je n’en puis plus fere.
Alexi, bel fiz, j’atendeie
De vos toz jors aucune joie,
Et a oir d’aucune part
Bone novele ou tost ou tart
De vos en aucune maniére.
Mès or n’i atent fors la biére,
Quer n’ai retor de vostre mort,
Ne rien a qui je m’en confort;
Quer vos n'avez frère ne suer;
Et por ce n’istra de mon cuer
Jamès ceste amertume hors,
Tant cum j'aie la vie el cors."
Que que cil feseit comme pére,
Atant evos venir la mére,
Marmitouse et eschevelée,
Breant comme beste effreée,
Qui por ses foons est engresse.
A grant peine derompt la presse;
Quant el vint la et le cors vit,
Li cors li faut et l'esperit:
Sor lui se pame plusors feiz;
Quer mout esteit si cuers destreiz.
Quant el revint de pameison
En son sens et en sa reson,
Folio37c
El cort a son fiz, si l’enbrace,
Bese li la bouche et la face,
Les euz, le front sanz dire mot;
Et quant ce fu que parler pot,
El se commence a doloser
Et a pleindre et a regreter.
En sun cuer a si grant hachiée
Qu’el se contient conme esragiée:
El tuert ses poins, ses cheveus tire,
Ele s’esgratine et descire,
El bat et son pez et sa teste.
Et fet tel noise et tel tampeste
Et bret et crie et haut et bas
Que je ne cuidereie pas
Qu’ele criast si haut d’assez
Quant Alexi son fiz fu nez;
S’est merveille qu’el ne se lasse
De crier : "Lasse! lasse! lasse!
Lasse!" fet ele, "mon effant!
Lasse! ja l’amoie je tant!
Trente et quatre anz l’ai atendu:
Or l’ai trové, or l’ai perdu!
Or puis je certeinement dire
Que j’ai trové dolor et ire
Et que j’ai perdu tote joie,
Quer j’ai perdu quanque j’amoie,
"Douz Dez, por que ne me gardastes
Mon fiz, quant vos le me donastes?
Folio37d
Ou por quei le me doniez,
Quant tolir le me voliez?
Ce fu por mei plus corocier:
Kar l’ai perdu sanz recovrier;
Ce peise mei, quer plus est pire
PageV01P179
Le retolir que l’escondire.
"Beau fiz, dont vos vint tel durece
Que vos seveaus en ma viellece
Ne me feistes nul confort,
Au meins einz que vosfussiez mort?
Que se j’eusse un sol petit
A vos parlé, mon esperit
En fust mès toz jorz plus a ese;
Mès je dei bien estre a mesese.
Mes euz, or del plorer asez,
Tant que vos seiez toz lassez,
Et tant que vos aiez perdue
Et la clarté et la veue:
C’est dreiz, quer se vos eusiez
Si bien comme vos deussiez
Alexi mon fiz avisé,
Il ne fust ja si desguisé
Que ne l’eusiez queneu:
Quer asez l’aviez veu
A mes mains lever et chouchier,
A mes mameles aletier.
Folio38a
.....
Or ne faz mes fors enpireir:
C’est cil qui torna en mes flans,
Par qui j’ai soffert tant ahans
Jadis au nestre e au norrir,
Mais li plus griés est au morir:
Quer cels alejoit esperance;
Or nos griéve desesperance.
"Alexi, beaus fiz, beaus amis,
En tel duel avez mon cuer mis
Que jamès nul jor que ge vive
Ne serai fors lasse chaitive,
Ne n’istrai de dolor amére.
Vos qui savez le cuer de mére,
Aiez pitié en vostre cuer
De ma dolor, quer a nul fuer
Ne porroit prou pitié avoir
Cil qui mon cuer ne puet savoir."
Iloques revint l’esposée,
Triste, mate, deschevelée,
Qui le regrete durement,
Quer el l’amoit veraiement.
"Lasse chaitive!" fet el, "lasse!
Onques n’oi de rien que j’amasse
Joie, solaz, ne compaignie.
Or ai usé tote ma vie
Et despendue ma jovente
En esperance et en atente,
Folio38b
Et or ai je del tot perdu
Ce que j’ai toz jorz atendu.
Ceste perte est sor totes pertes,
Kar or sui je vueve adecertes.
Ainceis que mi sires morust,
Aveie je, quel part qu’il fust,
Grant hennor del non de mari,
Qu’em m’apelot femme Alexi;
Mès or sui vueve sanz seignor,
Sanz cest non et sanz cest ennor;
Or n’ai je mès point de garant,
Fors Deu a qui je me commant.
Certes je suis mout corociée
Qu’il m’a issi de tot lessiée,
Quer il out m’amor primereine,
Si avra il la desreeine.
Je ne sai nul autre confort
Que je puisse aveir de sa mort
Fors que jamès autre n’avrai:
Virge sui et virge morrai."
Mout en est triste et corocée
Et le regretent la mesnée,
Et doucement se repenteient
Tuit cil qui meffet li aveient.
Touz le plorent communement,
Ker aus suens grant pitié en prent,
Et li autre en sont mout irié.
Folio38c
Que de corouz que de pitié,
N’i a cil qui n’en seit marriz:
Pleine meson de ploreiz
Peust l’en veer a cele hore.
Chascun le pleint, chascun le plore.
Lors kemanda pape Innocent
Que li cors fust mout richement
Conreez et en biére mis:
Plusors s’en sunt si entremis
Que il l’ont mout bien atorné;
Atant s’en sunt d’ilec torné
Et en portent dreit a l’iglise
PageV01P180
Le cors por fere le servise.
Mes einzceis que il fussent la,
Mout grant pueples i asembla.
Chascun se peine d’aprochier
A la biére et a le touchier
Por reverence et por santé;
Et tant en i vint grant plenté
Que il i firent mout grant presse.
L’un se drece, l’autre s’abesse;
L’un enpeint l’autre et hurte et bote
De teste ou d’espaule ou de cote;
L’un chiet adenz et l’autre envers,
L’un del tort, l’autre del travers;
L’un vet avant, et l’autre arriére,
Por passer par desouz la biére.
Mout ont les porteors lassez,
Folio38d
Mès miracles i out asez,
Comme de contrez redrecier,
De malades essanicier,
Et de rendre oie et veue
A ceus qui l’aveient perdue.
Quant li dui enperére veient
Les miracles qui aveneient,
Sor lor cous ont la biére mise;
Si l’en portent dreit a l’iglise
Saint Boniface. Por la presse
Departir, qui mout les compresse.
Font semer deniers ça et la;
Mès gueres ne lor profita,
Car li pueples plus volentiers
Cort a la biére qu’aus deniers;
Au mostier viénent a grant peine.
Le cors gardent une semeine,
Et ont fet fere de novel
Un sarcoil mout riche et mout bel
Et bien ovré d’or et d’argent,
Et entallié bien soutilment
A flors, a pierres precioses
Bien cléres et bien vertuoses.
Ileques ont le saint cors mis.
Issi fet Dex de ses amis.
Or preun Deu devotement,
Tuit et totes communement,
Folio39a
Que il nos doint par sa pitié
Si espurger nos de pechié
Et d’ore en avant vivre issi
Que nos ovec saint Alexi
Puisson estre par sa preiére
En vie et en joie planiére.
Amen.
*** END