AlexisPRI.txt

#META#  TextURI         :: AlexisPRI
#META#  DEAF            :: http://www.deaf-page.de/fr/bibl/bib99a.php#AlexisP
#META#  TL              
#META#  FEW        		
#META#  ARLIMA          :: https://www.arlima.net/no/114
#META#  Author          
#META#  AuthorBorn      
#META#	AuthorBornAmb
#META#  AuthorDied
#META#	AuthorDiedAmb
#META#	AuthorFl1
#META#	AuthorFl2
#META#  TextTitle       :: Li roumans de saint Alessin
#META#  TextSubtitle	
#META#  TextVols        :: 1
#META#  TextSubj        :: hagiography
#META#	TextDom
#META#	Translation
#META#	Collection
#META#	CollectionNo
#META#  TextDescARL     :: laisses de vers décasyllabiques assonancés (rédaction interpolée)
#META#  TextDescVers    :: 10
#META#  TextDateARL     :: Fin du XIIe ou du XIIIe siècle
#META#  TextDateAdj     :: f12, 13
#META#	TextDateMin
#META#	TextDateMax
#META#  EdEditor        :: Paris, Gaston; Pannier, Léopold
#META#  EdPlace         :: Paris
#META#  EdPublisher     :: F. Vieweg
#META#  EdVol           
#META#  EdYear          :: 1887
#META#  EdPages         :: 222-262
#META#  MsBase          :: S
#META#  MsOther         
#META#  MsNum           :: 1
#META#	MsDateARL
#META#	MsDateAdj
#META#	Form
#META#	Complete
#META#	NoWords
#META#	NoLines
#META#	DialAuth
#META#	DialScribe
#META#  ScanURL         :: https://archive.org/details/laviedesaintale03alexgoog
#META#  ScanURIOther	
#META#  ArkID           :: ark:/13960/t1jh3nt8t
#META#  LccnID          :: 14022514
#META#  OclcID          :: 67605175
#META#  WebAuthor       :: David Joseph Wrisley
#META#  ORCIDWebAuthor  :: orcid.org/0000-0002-0355-1487
#META#  WebReviewer     
#META#  ORCIDReviewer   
#META#  MiscInfo        
#META#  CCLicense       :: CC BY-NC-SA 4.0 International


*** START
PageV01P222
C’EST LI ROUMANS DE SAINT ALESSIN.
# |
Signour et dames, entendés un sermon
D'un saintisme home qui Allessis ot non,
Et d'une feme que il prist a oissor,
Que il guerpi pour Diu son Creatour,
Caste pucele et gloriouse flour,
Qui ains a li nen ot convercion;
Pour Diu le fist, s'en a bon guerredon:
Saulve en est l'ame el ciel nostre signour,
Li cors en gist a Rome a grant hounor.
Bons fu li siecles au tans ancienour,
10 Quar fois i ert et justice et amour,
Si iert creance dont or n’i a mais prou:
Si est mués perdue a sa valour,
[Jamais n’iert tels com fut aus ancesours.]
Faut i li biens, n'i puet avoir vigour:
Ne porte foi la moillier son baron,
Ne li vasals n'est faals au signour.
A essient perdons nostre signour;
Fraisle est la vie, ne duerra Ions jours,
# |
Al tans Noé et al tans Abraham,
PageV01P223
Et a Davi que Dieus par ama tant,
Fu bons li siécles : jamais n’iert si vaillans.
S’est empierés, et li biens va morant;
Ne porte foi li pére son enfant,
Ne le fius au parrin tant ne quant,
Et li signour vont lor moillier boisant;
Li ordené vont le loi mal menant:
Trespassé ont le Damediu commant.
Et saintes glises, filles Jherusalem,
De tout en tout se vont afoibliant.
La fois del siécle se va toute falant;
Fraisle est la vie: ne duerra lonc tans.
Conterai vous del pére et de l'enfant.
Que de mençoigne n'i a ne tant ne quant.
Sainte escriture em puis traire a garant.
Li fius servi bien Dieu a son vivant:
Li cors en gist en or et en argent
L'ame est en glore a Diu commandement.
# |
Li péres fu preudom et hounerés,
Diu ama bien, si maintint carité;
Mais li fius fu meldres de lui assés.
A son vivant servi si Damedé
Qu’en blanc argent et en or esmeré
En gist li cors a Roume la cité:
Tout cil le sévent ki a Roume ont alé
Et cerkié ont par les maistres autés.
Li siens moustiers ne fu mie obliés.
Puis icel jour que Dius nos vint sauver,
Nostre ancissour orent crestienté,
Fu nés uns sires a Roume la cité,
Rices hom fu de grant nobilité ;
Pour çou vous di, d’un sien fil voel parler.
# |
Eufemiens, ensi ot non li péres.
Des belisors qui a cel jour i érent,
Quens fu de Roume, de toute la contrée;
55 [Donc prist moillier vaillant et honorée,]
Fille Flourent, o non Boine Eurée.
# |
Bone Eurée li pére ot non Flourens.
Il l’espousa au los de ses parens;
PageV01P224
Puis conversérent ensanle longement.
Qu’enfant nen orent, poise lor en forment;
Diu en apèlent andoi parfitement :
«E! Rois de glore, par ton commandement.
Soit ta mercis et tes otriemens,
Qu’enfant nous donnes qui soit a ton talent.»
# |
Tant li priérent par grant humilité,
Que la moillier donna fecondité.
Un fil lor donne, si l’en seurent bon gré;
De saint bastesme l’ont fait rengenerer;
Bel non li misent selonc crestienté.
# |
Baptisiés fu, s’ot a non Alessi.
Qui le porta volentiers le nourri;
Puis li bons péres a escole le mist;
Tant aprist letres ke bien en fu garnis;
Puis l’envoia l'empereour servir.
# |
Li emperéres ot non Otevians.
Illuec servi enfreci a set ans.
Et puis l'a fait son maistre cambrelenc.
Se li carja tous ses commandemens,
Et sa justice deseur toute sa gent,
Cevaus et murs et palefrois amblans,
Et plainnes males entre or fin et argent.
Son pére ama; si l'en a donné tant
Et a sa mére, rice sont et manant.
Or voit li pére que mais n’ara enfant,
Mais que ce seul que il par aimme tant;
Dont se pourpense del siécle a en avant.
Si velt qu’il prenge moillier a son vivant.
Pour li a quise le fille un noble Franc.
# |
La pucele iert de moult grant parenté,
Fille a un conte de Rome la cité ;
Lesigne ot non, ses pères Signourés;
N’a plus d’enfans, bien le puet marier.
Emsamble en vont li doi pére parler.
Les dous enfans veulent faire asambler.
PageV01P225
# |
Noument le terme de leur assamblement.
Quant vint au jour, se l' fisent belement:
Ens el moustier saint Jehan del Latran,
Sains Alessis, al los de ses parens.
L'a espousée moult hounerablement.
Mais de tout çou ne vausist il nient;
De tout en tout a a Diu son talent,
Plus aimme Diu que nule rien vivant.
# |
Quant çou fu cose que il l'ot espousée.
De ses alues moult gentement douée,
105 Mout en fu liés et li pére et li mére.
Et si ami et cil de la contrée.
Puis l’emmena a le maison son pére.
# |
Quant lor conroi orent aparellié.
Et fait des noeces le premerain mangier,
De cel saint houme que Diex par ot tant chier.
Et de la feme ke il prist a moillier.
Dont va li jors, e vous la nuit cangier.
Ce dist li péres: «Biaus fius, alés coucier
Avoec t’espouse, a Damediu congié.»
Ne vaut li enfes son pére corecier.
Sus se leva envis u volentiers.
Va en la cambre o sa gente moillier.
Li pére i fu et la mére au coucier.
Le cambre ont faite encenser et joncier;
Tendent i pailes a or entrelaciés.
Quant il s'en issent, si font l’uis verillier;
A dous sergans les font la nuit gaitier.
Sains Alessins a parlé tous premiers.
# |
Sains Alessins esgarda la pucele.
Assés i ardent candoiles et lanternes.
Mout la vit gente et couroiteuse et bele;
Ses oels en tome vers le signour celestre
Qu’il amoit plus que nule riens terrestre:
«Elas», dit-il, «com fors pechiés m’apresse!
S’or nen m’en vois, jou crien que ne te perde;
Qui me fesis, pére qui tout gouvernes,
PageV01P226
Regarde moi de tes clers ex en terre,
Que ne perdés ne moi ne la pucele.
Donnés moi, sire, itel service faire,
C'onques diables de nous dous n'ait poeste.
Mes péres m’aime; si cuide grant bien faire.
Qui me desfie de la vie terestre:
Tollir me vieut nostre signour celestre.»
# |
Quant en la cambre furent andoi remés,
Sains Alessis prist a li a parler.
Le mortel vie li prist molt a blasmer;
De la celestre li moustre vérité.
Que lui ert tart ke il s’en fust tournés!
# |
«Bele», dist il, «celui trai a garant
Qui nous raienst de son precieus sanc
Et de la viergene fu nés em Belliant,
Et baptistere prist el flum de Jordant,
La soie vie n’ara ja finement.
# |
«Bele», dist il, «celui tien a espous
Qui nous raienst de son sanc precious;
Car en cest siecle nen a parfite amour:
A mout grant joie s’asamblent peceour,
Mais il desoivrent a doel et a tristour.»
# |
Quant ses paroles li ot issi contées,
Et la pucele les ot bien escoutées,
Del couvretoir Va puis acouvetée;
Prist un anel dont il l'ot espousée,
Dous pars en fist al trencant de l'espée;
L'une partie l’en a recoumandée,
Se li pria qu’ele soit bien gardée,
S'on li demande, k’ele soit aprestée;
Emsamble lui en a l’autre portée.
Que se jamais revient a sa contrée
Et il li moustre les ensegnes prouvées,
Que l' recounoisse entre li et sa mére.
Dist la pucele : «Or sui molt esgarée;
PageV01P227
Mainne me la dunt tu m’as amenée.
Por coi me lais? Ja m'as tu espousée.
Que querras ore en estrange contrée?
Que porai dire ton pére ne ta mére?
Sempres m’aront de lor terre jetée.
Puis m’en irai com autre asoignentée.
Tel honte arai jamais n’iere hounerée.»
«Bele», dist il, «n’estes mie senée:
A Diu te tien, si devien s’espousée,
T’ame iert el ciel roine corounée,
Em Paradis iert mise et alevée.
# |
«Bele», dist il, «ja sés tu bien de fi
Que l’ame estuet de nos cors departir;
Que caut del cors, quant en tere porrist?
L’ame iert moult lie qui Diu ara servi:
Droit en ira es ciels dont elle vint
Al Saint Espirt dont Damedius le fist,
Li cors en tere dont il fu establis......
Li cars deduist, li os ne puet porrir,
Doucement flaire comme flors en avril,
Et del mort home refera Dius le vif.
Las! li meffait que porront devenir?
Qui estorra del cors au departir
Dont li cors put et li os est pouris,
Ens en abisme trebuce al maleis,
Sous limo terre dont ja n'iert revertis;
Ne sains ne sainte nen iert ja si hardis,
Que ja li proit qu’il li face merci.
Pour Diu, pucele, enten çou que jou di;
Car tu ne sés que t’est a avenir:
Qui plus durra, vivera moult petit
Envers la vie qui grans est a venir
Del nouvel siecle qui duerra tondis.
# |
« Qui fait le bien se reçoit Damedés,
Et qui le mal, cil est mal eurés:
Ens en infer le trebuce maufés.
PageV01P228
Sous limo terre dont j a n'iert racatés.
Sainte escriture ne set avant aler.
Dotant celui ki ne puet amender;
S'il ert dolenz ne l'estuet demander.»
Ot le la bele, ne cesse de plorer:
«Sire», fait ele, «or te commant a Dé
Quant autrement ne te puis retorner.»
Cil fu moult liés, si volt del lit lever;
Et en apres le prist a rapeler:
# |
«Bele pucele», ce dist sains Alessins,
Or m'en irai en estrange pais,
Mais jou ne sai com iert del revenir:
De cest anel que jou ai departi
Ceste moitié qu'en m'aumoniére ai ci,
D'ui en un an le renvoierai ci
Par un mesaige u moi se jou sui vis
Se ne revieng, puis pues prendre mari;
Savoir porras que alés sui a fin.»
Ot le la bele: si a jeté un cri:
Quide sa mére que il juast a li.
«Bele», dist il, «vous me volés hounir.»
«Par Diu», dist ele, «aiés de moi merci.»
«Sire», dist ele, «moult ai mon cuer mari;
Se moi en poise pour coi me as plus vil?»
«Certes nen ai», çou dit sains Alessis,
«Ains vous aim plus que riens que Dius fesist,
Sans cel signour qui nous forma et fist;
Ja le querrai u il fu mors et vis.
Et au sepulcre u il resurrexi.
Qu'il nous reçoive ens el saint paradis.»
«Sire», dist ele, «Dius vous i laist venir!
# |
«Frans hom», dist ele, «quel le vauras tu faire?
Gehis le moi pour Diu et en confesse;
Se je l' di home, Diu em puisse jou perdre.»
Quant il oi que pour Diu l'en apele.
Dont ne l' laissast pour nul avoir de tere:
«Certes», dist il, «Damediu irai querre.
PageV01P229
Qu'il nous reçoive a son regne celestre.
Il ne faut mie a houme qui le serve.»
«Au congié Diu, sire», dist la pucele:
«Grand duel arai et nuit et jors acertes;
Jou remanrai caitive en ceste terre.»
# |
Quant il oi qu'elle l'ot otroié.
Sous ciel n'a home qui l' peust courecier.
«Sire», dist ele, «com ert del repairier?
«Di me le terme, sel ferai metre em brief.
Mout as dur cuer qui or me veus laiscier,
Et pére et mére qui par t'ont si trés cier.
Jou sui moult fole, si ne fas mie bien.
Quant ne te fai et piés et mains loiier.»
Dont ploura il des biaus oels de son cief.
«Certes, pucele, del terme ne sai nient:
L'en set quant va, mais l'en ne sait quant vient.
Que que jou face, a Damediu te tien.»
«Que Dius vous doinst a joie repairier:
Se ne te voi, mais n'arai mon cuer lié.»
«Bele», dist il, «pour Diu ne te targier;
De Diu servir plus ne te voel proiier.
Car ja peciéres n'en iert si eslongiés.
Par sainte glise ne puisse repairier:
C'est li services que Diu par a moult cier.»
Dist la pucele: «Sire, vous dites bien.
Car se Diu plaist, or le ferai moult bien.
Se Diu tant m'aime que m'i laist aprocier.»
# |
«Bele pucele,» çou dist sains Alessins,
«Ne devons mie nos cors si raemplir
De grans ventrées que veulent recueillir;
Car endementre que li peciére vit
Et tient le bien dont li cors doit garir.
Il en doit bien pour s'ame departir :
A la grant joie qui est en paradis,
La est la vie qui ja ne prendra fin.
Dolant le cors qui tout veut engloutir:
C'ara dont l’ame quant li cors a trop pris?
Quant ja li hom n'ara si cier ami
PageV01P230
Puisqu'il est mors et alés a sa fin,
Que ja le veulle plus oir ne veir,
Ains li est tart que il soit enfouis!
A mal eur cil est engenuis.
Qui se travaille pour infer deservir.»
Dist la pucele: «Sire, voir avés dit.
Les vos raisons doit on bien retenir.»
Estes les vous belement departis,
Plorent des oels, ne se porent tenir,
Et la pucele gentement li a dit:
«Or t'en vas, sire, Dieus te laist revenir.
Quant autrement ne te puis retenir.
Dolante en ert cele qui te nori,
Si ert li péres qui toi engenui.
Et jou meisme qui t'avoie a mari.
Jou remanrai en estrange pais.
Et esgarée entre tous mes amis.
Hui verrai noeces a grant duel departir;
S'encor ne t' voi, de duel m’estuet morir.
# |
«Or t'en va, sire, jou te commant a Dé,
Quant autrement ne te puis retorner.
Cil ert dolans qui t’avoit engenré,
Si iert ta mére qui te porta en lés.
Et jou meisme qui sui en veveé.
Hui verrai noeces a grant duel desevrer.»
Il se signa, si le commande a Dé.
Ele l'apèle doucement et souef.
«Sire», dit ele, «jou te commant a Dé.
Con faitement m'en porrai consirer?
S'a ten consel le peusse trouver,
Qu'ensemble toi me laissaisses aler,
Ja me veroies gentement conreer,
Tondre mes crins, un capel afubler,
Et prendre escerpe et un bourdon ferré;
Servirai toi de tes dras relaver.
Ne ja luxure ne m’ verras demener,
Ne adultére, ne autre puteé.»
«Non ferai, bele, ains te commant a Dé,
PageV01P231
Le glorious qui pour nous fu penés
En sainte crois, pour son pule sauver.»
Ele commence grant duel a demener.
Il vint a l'uis, sel deffrema souef;
A mienuit s’enfuit de la cité,
Si que ses pére et sa mére ne l’set,
Ne li serjant qui l'orent a garder.
De c'est moult liés, s'en loe Damedé,
Que la pucele l'en a congié douné.
Quant il fu jors et solaus fu levés.
Descent un val, s'a un tertre monté
A quatre liues de Roume la cité;
Regarde Rome et en lonc et en lé.
Envers le ciel en a son vis torné,
Estroitemenl a Jesu reclamé.
Que la pucele dont issi a esré
Doinst en cest siécle tel vie demener.
Que l'ame en soit el saint regne de Dé;
Puis se li est de son pére membré
Et de sa mére : si commence a plourer.
Par lui meisme s'en est reconforté.
Droit en la mer en aquelt son esrer.
Preste est la nés u il porra entrer:
Donne son pris, si est tous seus entrés.
Drecent lor sigle, laissent courre par mer.
En Jersalem les conduist Damedés :
Sains Alessins est issus de la nef.
# |
Sains Alessins est de la nef issus;
Vint al sepulcre u nostre sire fu.
Fist ses priiéres, si s'est confès rendus.
Dous jors sejourne et dous nuis i estut,
Qu'il ne manja ne sa bouce ne but ;
Après en est al flun Jourdan venus,
U li baptesmes de nostre signour fu,
Et li apostle si baptisiérent tuit.
Il se despoille, si se baigna tous nus;
Puis prist des palmes, si s'en est revenus.
Pour les Juis n’i osa estre plus.
PageV01S232
Car a cel jour que li sains Iiom i fu
N’i avoit il des Crestiens nesun.
Droit a le Lice a son cemin tenu.
# |
Droit a le Lice, une cité moult bele,
Iluec s’en va sains Alessis par terre.
Mais jou ne sai com longes i converse.
U que il soit, de Diu servir ne cesse :
De sa maisnie veut il a toujours estre.
# |
Après en va en Aussis le cité,
Pour une ymaige dont il oi parler
Que angle fisent par le commant de Dé,
El non celi qui porta sauveté.
Onques faiture ne fu de sa biauté
Sans nostre dame, la mére Damedé.
# |
Iceste ymaige, signour, dont je vous cant.
Cou n'est de fust, ne n'est d’or ne d'argent.
Mais li sains angles ki fist l'anoncement
De nostre dame u Dius prist car et sanc
Esgarda bien son vis et son semblant.
Si fist l'ymaige par Diu commandement.
Pour soie amour le mist non Marien.
# |
Marie ot non, comme la mére Dé.
Si vint du ciel, de sainte maisté.
Par un devenres de la crois aourer.
Que nostre sire transi pour nous sauver;
Par itel jour de la passion Dé
Le mist li angles issi en la cité:
Ainc en la tere nen ot plus povreté.
La le requist sains Alessis li ber;
Tout son avoir que il en ot porté
A departi: ains rien ne l’en remest.
Larges aumosnes par Ausi la cité
Douna as povres u qu’il les pot trouver.
Pour nul avoir ne vaut estre encombrés
Ne ne volt perdre del ciel les iretés.
# |
Quant son avoir lor a tout departi.
PageV01P233
Entre les autres s’asist sains Alessins,
Reçust l’aumosne la u Dius li tramist.
Tant en retint que son cors en soustint:
Le remanant en rent as poverins.
# |
Or revenrons au pére et a la mére,
Et a l’espouse ki seule en est remése.
Quant il çou sorent ke il fuis s’en ére,
Çou fu grans deus que il en demenérent,
Et grans complaintes par toute la contrée.
# |
«Fius Alessins de ta dolante mére
Tu m’es fuis, dolante en sui remése.
Le liu ne sai ne ne sai la contrée
U jou te quiére: toute en sui esgarée.
Ja n’ierc mais lie, biaus fius, si n’iert tes pére,
Se ne reviens en iceste contrée.»
Çou fu grans deus que il en demenérent.
# |
Vint en la cambre plainne de mariment;
Si le despoille que n’i laissa nient;
N’i laisse paile ne nul cier garniment.
Tost a tourné a grant duel son talent ;
Par grant dolour se dejète souvent.
Ains puis cel jour n’en fu lie granment.
# |
Vint en la cambre, toute l'a desparée,
Si l’a destruite comme elle ert la vesprée,
Ostent les pailes et les courtines lées,
415 Sa grant ricoise a a grant duel tornée,
Ains puis cel jour ne fu lie li mére.
«Cambre, dist ele, mal fuissiés atornée.
Contre ques nueces vous avoie parée!
Jamais en vous n’iert leèce trouvée."
Tel duel en ot, a poi ne ciet pasmée;
Quant par la main le reliéve li pére.

De la dolour s’asist la mére a tere,
Ne s'asist mie ne sour banc ne sour sele;
Si fist l’espouse saint Alessin, la bele:
«Dame,» dist ele, «jou ai fait moult grant perte.
PageV01P234
Jou ai perdu mes nueces les nouveles.
Or mais vivrai a loi de tourterele
Qui pert son malle, puis ne veut autre querre.
Quant n’ai ton fil, ensamble toi voel estre.
Servirai Dieu, car miex ne puis jou faire.
S'il ne revient, ne a toi ne repaire,
Jou me tenrai devers le roi celestre;
Car a nul houme n'aurai jamais a faire;
Ne me faura s’il voit que jou le serve.
# |
Respont li pére: «Que bone feme as dit:
S’ensemble moi te voloies tenir
Servirai toi pour amour a mon fil.
Ja n’aras mal dont te puisse garir :
Faille me Diex, se te fait a nul di.»
Dist la pucele : «Sire, vostre merci.
Il m'espousa al los de mes amis,
Or sui malvaise, si me doit Diex hair,
Si moi ne membre de çou que il me dist
A icele eure que de moi departi.
Quant tu pour lui me vauras retenir.
Très or tenrai Damediu a mari:
Ne me faura se jou le voel servir.»
Quant ot la mére que la pucele dit.
Que Damedeu servira pour son fil,
Tout em plourant la baise enmi le vis;
Plourent ensamble del duel de lor ami,
L’une son fil et l’autre son mari.
# |
Pleurent ensamble lor ami c'ont perdu.
Pleure la mére et la pucele plus.
«Dius, dist la mére, qu’est mes fiex devenus?»
Çou dist li péres : « Peciés le m’a tolu.»
«Dius,» dist l’espouse, «com petit l’ai eu!
Hier euc signour, mais n’en ai ore nul,
Sans Damediu, le glorious la sus.»
# |
Dont prist li pére de ses millors serjans;
Par moult de terres fait querre son enfant.
PageV01P235
Dedens Ausis vinrent tout droit esrant.
Illuec trouvérent dant Alessin seant:
Entre les autres va l'aumosne querant;
Ne recounurent son vis ne son samblant.
# |
Dont ot li enfes sa tenre car muée,
Sa vesteure desroute et despanée,
Qu’il ot portée par estranges contrées,
Nel recounurent li doi sergant son pére,
A lui meisme ont l’aumosne dounée.
# |
Nel reconnurent, ne ne l’ont entercié.
Sains Alessis en loe Diu del ciel,
Des sers son pére qui il ert aumoniers.
Ains fu lor sire: or est lor provendiers :
Ne vous sai dire comme il par s’en fist liés.
# |
Li doi serjant s’en vont a lor ostel;
Il les poursuit tant que les vit entrer
Pour l’ocoison de l’aumosne donner
S’en va a l'uis lor raison escouter
Li serjant fisent lor oste o els disner.
Se feme et il prisent a demander:
«Signour,» dist il, «ques hom est que queres?»
«Un chevalier, un jovene baceler,
Un gentil homme, si iert de Roume nés;
Onques ses péres, qui l’avoit engenré,
N’ot plus d’enfans; sel pooit moult amer.......
Sous ciel n’a houme, s’il l’ooit regreter,
Ne li estuece des iex del cief plourer.
Avoirs nous faut, n’avons mais que donner.
Veullions u non, nous en estuet aler.»
«Dius, dist li ostes, qu’en feriés vous el?"
Sains Alessis a bien tout escouté.
"E! cuers, dist il, com estes adurés!
Gente pucele, mout de mercis et grés:
Jou t’ai fait mal et tu m’as houneré.»
PageV01P236
Pitié en ot: si commence a plourer.
Li serjant virent qu'il ne l' porrent trouver.
Trois fois l'ont quis par Ausis la cité.
Par moult de teres l'ont quis et demandé.
II nel connurent, si ont a lui parlé.
Puis s’en repairent en Rome la cité.
Noncent au pére qu’il ne l' porent trouver
S’il fut dolans, ne l’estuet demander.
Veullent u non, metent l'el consirer;
Mais lor grant duel ne puent oublier.
Alessis est en Ausis la cité,
Son signour sert par grant humilité,
Que anemis ne l'em puet encombrer.
# |
Dis et set ans, ainc rien n’en fu a dire,
Pena son cors en Damedieu service.
Ce ne fist il pour ami ne amie,
Ne pour hounor qui li en fust a dire,
Mais pour celi qui fu nés de la virge.
Pour nul avoir ne s’en tornera mie.
# |
Quant son coraige ot a çou atourné,
Que ja son vel n’istra de la cité,
Dius fist l'ymage pour Alessin parler.
Par un miedi de la Nativité
Que tous li pules fu par matin levés,
Pour le service qu'il durent escouter.
Il i vint ains que sains i fust sonnés
Si com li hom qui 'n iert acoustumés.
En es le jour que Damedieus fu nés
Fist Dieus l'ymaige trois fois pour lui parler,
L'ymaige en a Ermener appelé.
Un saige clerc qui servoit a l’autel.
Çou dist l'ymaige : «Apèle l'oume Dé;
Car il est digne d'en Paradis entrer.
Et pére et mére guerpi pour l'amour Dé
Et son avoir et tout son parenté.
Bon guerredon l'en rendra Damedés:
A grant martyre a son cors atourné.»
PageV01P287
# |
Çou dist l’ymaige: "Fai l’ome Diu venir
En cest moustier, car bien l’a deservi;
Car il est dignes d’entrer em paradis.»
Cil va, sel quiert, mais il ne l’ set coisir
Icel saint home de cui l’ymaige dist.
Devant l’ymaige revint tous esbahis.
# |
Li clers revint esmaris al moustier,
Devant l’ymaige commença a prier.
«Gentiels ymaige, ne sai qui entercier;
Angle te fisent par commant Diu del ciel;
Tel paour ai, tous sui desconsilliés.»
Çou dist l’ymaige: «Celuy qui les l’uis siet,
Près est de Diu et del régne del ciel.
Par nule guise ne s’en veut eslongier.».
Ot le li clers, s’est issus del moustier.
# |
Ot le li clers, fors del moustier issi.
Par les ensegnes que l’ymaige li dist
Le reconnut: onques rien n’i falli;
Cele part vint, a apeler le prist.
"Com as tu non? car me dis, biaus amis.»
«Sire,» dist il, «j’ai a non Alessis,
Uns peciére hom, se voel espeneir.
A ceste feste c’on dist Arcedeclin,
Que nostre sire forma de l’aige vin,
Adonques iérent dis set ans acompli,
Que jou issi tous seus de mon pais;
Ainc puis ne vi nul home de mon lin;
Ne sai se Dius m’i feroit revenir.
Car jou fui clers, de letre bien apris,
Puis fui tant fols, que chevaliers deving;
Feme espousai et mes nueces en fis:
Ains le guerpi que li plais departist.
Qui çou a fait, comment porra garir?
N’en orés plus, "Alessins li a dit.
Ot le li clers, si l’en a fait enclin:
As piés li ciet, et cil le recuelli.
E vous la noise par trestout le pais
Que cele ymaige parla pour Alessin.
PageV01P238
Tout l'en hounorent, li grant et li petit.
Si fust evesques se le vausist souffrir.
# |
Quant il voit çou que l' veulent hounerer
Et vesque faire en Ausi la cité,
«E Dieus», dist il, «ci ne voel mais ester.
De grant ricoise et d'orguel demener
Ne puet on mie Damedieu acater.»
A mienuit s’enfuit de la cité.
Ne quist congié ne n'osa demander,
Contre son gré ne l'i facent ester;
Droit a la mer en aquelt son esrer.
[Dans Alessis entra en une nef,]
Donna son pris, si est dedens entrés.
Drecent lor sigle, laissent courre par mer;
La prendront terre u Dius l'a destiné:
Droit a Troholt quidiérent ariver,
Mais ne puet estre, c’autre part sont torné;
Tout droit a Roume les conduit li orés,
A un des pors qui plus près de Roume ert.
# |
A un des pors qui ert plus près de Roume,
Illuec arrive li nés a cel saint home.
Quant voit son regne, mout forment s’en redoute.
Fait ses priiéres, a orisons se coce,
Diu en apèle et saint Piére de Roume,
De ses amis, que ne l’ counoissent onques
Ne de l’onor del siécle ne l’encombrent.
# |
«E Dius», dist il, «glorious rois celestres,
Se toi pleust ici ne vausise estre.
Se me counoissent la gens de ceste tere,
II me prendront par force et par poeste:
Si jou's en croi, il me trairont a perte.
# |
«Ajue, Diex qui nous as em baillie:
Se vel avoir le vraie compaignie.
Et deservir vostre durable vie.
PageV01P239
Se me counoist ma mére l'esmarie
Et mi parent, et m'espouse, et me sire,
Il me tolront le vostre compaignie,
S'il me rembatent en ceste mortel vie.
Deffent me Diex, de toutes males visces,
Et del diable que il ne m'escarnisse :
Ne puis muer le cuer ne m'asousplice.
Et ne pourquant mes péres me desire;
Si fait ma mére plus que feme qui vive,
Si fait l’espouse que je lor ai guerpie
A tous les jors que jou aroie a vivre:
N'estoit mais eure, plus lié ne m'en fesisse
Conduit me done, sire, par itel guise.
Que bien les voie et sace lor couvine.
Ne me counoissent, ne nus hom ne lor die;
Puis m'en iroie faire vostre service,
Si esteroit l’ame moie garie.»
Ist de la nef quant s'orison ot dite.
# |
Quant issi ot ses priiéres finées
Si li a Dius de trestout escoutées,
Qu'envers lui orent lor veues tourblées:
Ne l' recounurent li pére ne li mére.
Ne si ami, ne cil de la contrée.
Ne la pucele que il ot espousée.
# |
Sains Alessins est issus de la nef,
Tout un cemin s'en commence a aler,
Sous une espine s’asist pour reposer.
Il est malade, si est moult enfremés;
Si crient morir par estranges ostés;
Son sautier a parfondement preé:
II l’a ouvert, si a dedens gardé.
Si a tels letres el parcemin trouvé.
Que la mere a son enfant a garder
Set ans tous plains: c’est li primiers eés;
Et puis après, s'il ciel en effretés,
Toute sa vie que il a a durer;
PageV01P240
Or vauroit si son pére araisonner,
Par itel guise peust a lui parler
Nel couneust a son roumanc parler,
Et sa prouvende li vaura demander,
S’a Dieu pleust que li vausist douner.
Si vauroit miés ses aumosnes user
Que les autrui dont il fust encombrés;
S’en esteroit plus sauls a Damedé,
N' en son herbec ne vauroit ja ester,
Mais ça defors gesir sous son degré;
Puis atendroit le merci Damedé
Et le juise qu’il li a destiné.
De sa despoille est tous atapinés.
Va s’ent en Roume a son pére parler.
# |
Si s’atapine que on ne le counoisse,
Toute la rue s’en est alés en Toivre,
Parmi les rues u il fu ja bien comtes;
Autre puis autre, et son pére i encontre,
Ensamble lui grant masse de ses homes.
Bien le counut, par son droit non le noume.
# |
Son pére encontre ki revient d’orison;
Si iert sa mére qui le tient par le poing,
Del moustier vienent saint Piére le baron:
A messe furent et a pourcession;
Del fil parloient, mais il n’iert gaires lonc;
Il l’apela, si l’a mis a raison :
[«Eufemiens, beaus sires, riches hom,]
Car me herberges, pour Diu, en ta maison;
[Sous ton degré me fai un grabaton :]
Enfers hom sui ; pais moi pour Diu amour
Et pour ton fil qui Allessis ot non,
Qui te guerpist, dont tu as tel dolour;
Que Dieus del ciel itel talent li doinst,
Que il reviegne a toi en ta maison!»
# |
Quant ot li pére ramentevoir son fil,
PageV01P241
Pleure des oels, ne s’en pot astenir:
«Pour Dieu», dist il, «et pour mon cier ami,
Tot te ferai, bons hom, çou que tu dis,
Lit et ostel et pain et car et vin ;
Que Damedius faice tous ciaus merci,
Qui le herbegent par estrange pais.
Dis set ans a que de mes oels ne l' vi.
E las peciére, ne sai s'est mors u vis.»
Uns rices hom iert la, dans Coustentins,
Et voit le pére ki herbege le fil.
Le pére apele: gentement li a dit:
« Laissiés le moi, sire, vostre merci:
O moi venés, biaus sire pelerins;
Herbegiés estes s'o moi volés venir.
Emsamble moi se vous volés tenir,
Ne vous faura ne pains ne cars ne vins.
S’ains muir de vous, Diex ait de moi merci,
Et vous ament par coi puissiés garir!»
«Sire», dist il, «de Diu cinc cens mercis:
Dex herbet toi en son saint paradis!
Hom sui estranges, si vieng d'autre pais
Et ostel quier et pour Diu i sui mis....
Et celui laisse que il a recuelli.
Et milleur quiert pour son cors miex servir,
S'en celui muert, pris est a male fin:
Diu a perdu et son saint paradis.
La me tenrai u primiers me sui pris.
Quant on pour Diu m'i volra recuellir. »
ot le la mére, si l'a al pére dit:
«Sire», dist ele, «ja t'a il ostel quis:
Car le herbeges, pour Diu et pour ton fil.»
«Dame», dist il, «prés en sui et garnis.»
Ot le la mére, si rapela son fil.
«Herbegiés estes, biaus sires pelerins.
Ensamble moi vous em poés venir,
Et pour l'enfant pour cui lavés requis
Ja n’arés mal dont vous puissiés garir.»
«Dame», dist il, «de Diu moult de mercis.
Et le signour ki vous doit maintenir.
PageV01P242
Et a l'enfant c'aviés engenui,
Doinst tel coraige que il puist revenir.
Il revenra: pour voir le vous plevis.»
Ot le la mére, si l'en a fait enclin;
Pleure des oels, et li pére autresi.
# |
«Eufémien, biaus sires, rices ber,
Herbegiés sui la merci Damedé.
Enfers hom sui, soufraitous de parler;
Un grebeton me fai sour ton degré,
Pour cel enfant ke tu pues tant amer.
Que Dius li doinst itel home trouver,
Qui si le saint qu'a li puisses parler.»
«Bons hom», dist il, «pour amor Damedé,
Et mon enfant pourcoi l'as demandé,
Herberc aras et pain et car assés,
Et puis del vin quant vous boire en vaurés.
Que Dius assoille toute crestienté
Qui l' me herbet par estranges ostés!
Moult a dur cuer que si m'a oublié.»
# |
Pleure la mére le duel de son enfant
Qu’ot ramentoivre, dont ot le cuer dolant.
Li pére en va ses mains si detorjant
Que a la tere en cairent si gant.
Sains Alessins s'abaisse, se li rent.
«E Dius», dist il, «vrais pére tous poissans!
Quele amistié entre pére et enfant!
Ces felonnies que jou lor fac si grans.
Me sont legiéres, ses trouverai pesans:
Al grant juise me revenront devant,
Pour pére et mére qui me pourmetent tant,
Que si par fac coureciés et dolans.
Ajue, Diex: s'en sont si desirant!»
Com il les voit plourer si tenremant.
Iriés en est, mais il n’en fait samblant.
Crient et redoute ne l' voisenl ravisant.
PageV01P243
De tout a mis en Jesu son talent.
Mieus aimme Diu ke nul home vivant.
«Dius», dist li pére, «cor eusse un sergant
Qui le gardast trestout a son talant!
S'il estoit sers, jou le feroie franc.»
Un en i ot qui s’en presente avant.
«Vés me ci, sire, se Y gare par vo commant,
[Par toie amour en soufrirai l’ahan.]»
# |
Donc le menat endroit sous le degré:
Fait li son lit ou il puet reposer
Tout li aporte qanque besoins li est:
Vers son seignour ne s’en veut mesaler,
Par nule guise ne l’em puet om blasmer.
# |
Souvent le virent et li pére et li mère,
Et la pucele que il ot espousée:
Par nule guise onques ne l’ ravisérent.
Il ne lor dit, n’il ne li demandérent,
Ques hom estoit et de quele contrée.
# |
Souventes fois lor vit grant duel mener,
Et tout pour lui, et nient tout pour el,
Et de lor eus souventes fois plourer.
Il les esgarde: sel met el consirer,
N’a soig que l’ voie si est a Diu tornés.
# |
Sour le degré u gist sour une nate,
La le paist on del relief de la table;
Sa povreté deduist a grant barnaige.
Il ne veult mie que sa mére le sace:
Miels aime Diu que trestout son lignaige.
# |
De le viande qui del ostel li vient,
Tant en retient que son cors en soustient:
Le remanant en rent as prouvendiers;
N’en fait mugot pour son cors encraissier,
As povres gens le redonne a mangier.
En sainte eglise converse volentiers;
[Chascune teste se fait acomungier;
PageV01P244
Sainte escriture ço ert ses conseillers,]
De Diu servir qui le rueve efforcier.
Sains Alessis ne s’en voelt eslongier.
# |
Sous le degré ou il gist et converse,
La li aporte a mangier la pucele
Qu'il espousa, et sa feme doit estre.
A grant barnaige deduit sa grant poverte.
Li serf son pére, qui le maisnie servent,
Lévent lor mains, hanas et escueles,
Les laveures li getent sour la teste.
Ne s’en courouce ne il nes en apele.
# |
Tout l’escarnissent, si l' tienent por bricon:
L'aige li getent et moillent son liton;
Ne s’en courece icil saintismes hom,
Ains prie Diu que trestout lor pardoinst,
Par sa merci, mais ne sevent qu’il font.
Par une feste de sainte rouvison,
Monta li pére tes degrés contremont.
Et vist gesir son fil el grabaton.
Il l'apela, si l'a mis a raison:
«Biaus crestiens, ne savons vostre non.
Faut vous conrois de coi aiés besoing?»
«Sire», dist il, «Crestiens ai a non.
Et trestout cil qui levé sont des fons.
Qui cest non garde s'en a bon guerredon,
Et qui ne l' fait, mort morians a non.
Li cors porist, l'ame toute en pert on
Fors de la garde des mains nostre signour.
# |
«Par mon droit non, sire, m'avés noumé,
Se tant sui bons que m'en puisse garder.
En saint baptesme, en fons, me fut donnés,
Mais jou l' criem perdre par mal siecle mener.
Conroi ai tant que ne le puis user.
Celui em puisse grassier et loer,
PageV01P245
Pour cui amour le me faites donner!
II vous ramaint celui ke tant ames!»
«Bons hom», dist il, «ke me ramentevés?
N’est mie vis qui tant a demouré.
Salve en est l’ame, se Dieu l’a commande;
Et Dius en penst par sa grant pieté.
Mout a dur cuer qui si m'a oublié.»
Va sent li pére, et li fils est remés.
E vous le mére qui descent al degré.
Et le pucele la fille Signoré,
Çou fu l’espouse, un mantel affublé
D'un paile brun, d’un hermin engoulé.
Quant il les voit, s'est mout espoentés,
Que par pecié ne lor soit endité.
Quant il les voit et venir et aler,
Et vair et gris et bliaus trainer,
Par desor lui et descendre et monter,
N'est tant hardis qu'es ost araisonner,
Que ne l' counoissent a son roumanc parler,
Que ne l' rembatent ens el pecié mortel.
Li mére apele la fille Signoré:
«Savés, pucele, dont m'ara moult pesé?
Moi est avis cis pelerins me het.
Mout longement a o nous conversé,
C'onques nule eure ne me vaut aparler.
Il est malades, si est moult enfremés;
Ne vivra gaires, car moult est descarnés.
Car li faisons ses drapiaus relaver;
Çou iert aumosne, si nous en sara gré.
Savoir vauroie de quel pais est nés:
Nel sarons mais puis k'il iert deviés.»
Dist li pucele: «Alons li demander.»
# |
Çou dist li mére: «Jou i vois moult envis:
Quant je l' regart, membre moi de mon fil;
Pour un petit ne l' resamble del vis.
Lors plour des oels, ne m'en puis astenir:
Çou est li dels dont m'estora morir.»
Cele part vint, a apeler le prist:
«Dont estes vous, biaus sire pelerins?»
PageV01P246
«Dame», dist il, «pour amor Dieu, merci.
Jou sui malades: si suis près de ma fin:
Je ne devroie vous ne autrui mentir,
Car par mençoigne pert on saint paradis:
D'ui a tierc jour le sarés bien de fi.»
Car or aproce al tans et a sa fin,
Et au juise ke il devoit morir.
Mais ains qu’il muire, vaura faire un escrit,
Si metra tout par letre el parcemin,
Si com li sire qui bien en est garnis,
Et trés bien set et letres et escrit.
«Aprociés moi», dist il, «dame, un petit.»
Ele s'aproce dusc' au lit u il gist.
Il s'abaissa; as piés se li cai;
Puis le baisa, se li cria merci.
«Sire», dist ele, «quel pardon m’avés quis?»
# |
«Sire», dist ele, «quel pardon me querés?»
«Pour mon malaige quic jou estre encombrés.»
«Sire», dist ele, «tout vous soit pardonné.»
« Vostre grant painne que eu en avés,
Pour amour Diu, si le me pardonnés.»
Et la pucele les a bien esgardés,
Se li pardonne, ele fait autretel.
Ele s’en tourne, cil est moult liés remés.
# |
Iluec converse issi dis et set ans.
Ne l' recounurent ne li serf ne li franc,
N’onques nus hom ne sot de ses haans,
Fors sol li lis u il a geu tant:
Ne pot muer, cil fu aparisans.
# |
Dis et set ans a prourendiers esté,
Et autretant en Ausis la cité.
Ne but de vin ne de car n'a gousté,
Mais del relief qui li vint de l'ostel
Poi en manja a l'eure del souper,
A tout le mains qu'il s'en pot consirer.
# |
Quant li sergant li dounent del relief,
PageV01P247
Tout le millour en rent as prouvendiers,
Et le plus pesme retient a son mangier;
Dous jors jeune, puis si manjue au tierc.
Ore est fourment ses cors afoibliés
Se li a Diu pardonné ses peciés.
Sa fins aproce, s’en loe Diu del ciel.
# |
Trente quatre ans a si son cors pené;
Dex son service li velt guerredonner:
Sa fins aproce ke il doit devier;
Se li a Diex ses peciés pardonnés,
Ses cors est nés comme argent esmerés.
Moult li agriéve li soie enfremetés,
Et si set bien que il s’en doit aler;
S'en est moult liés, s’en loe Damedé.
Cel sien serjant a a lui apelé.
# |
«Os tu, serjans, qui tant jour m’as servi,
Dius et sa mére le te puisse merir,
Povres hom sui, ne l’ai que departir.
Quier moi, biaus frère, et enche et parcemin,
Et une penne: si ferai un escrit.
N’escris pieça: or m’en est talens pris.
Esbatrai moi; pesans sui de morir."
«Au congié Diu», li serjans respondi.
# |
Cil li va querre, si li a aporté.
Quant il le tint, s’en loa Damedé.
Tout i escrit quanqu’ il a manouvré,
Et çou i mist de quels parens il ert,
Com s’en ala en Ausi la cité,
Et com l’imaige fist Dius pour lui parler,
Et pour l’ounour dont le vaut encombrer
S’en rafui en Roume la cité;
Sen boin serjant n’i vaut mie oublier,
Que mieus l’en sot quant tant jour l’a gardé.
Les lui le tint, ne vaut pas demoustrer,
C’om ne l’ counoisse dusqu’il s’en soit alés.
Car ainc n’ama loenge seculer.
Sa fin aproce, li cors est agrevés;
PageV01P248
Droit entour none s’acoise de parler.
En es le jour que il dut devier,
«Diu consumate» em prist a apeler.
Onques nus hom ne l'oi d' el parler.
En la semainne que il s’en dut aler
Vint une vois trois fois en la cité
Fors del sacraire par commandement Dé,
Por son ami qu'il en voloit mener:
Preste est la gloire u il porra entrer.
Cel jour a dit: «Car querés l'oume Dé.»
# |
A haute vois lors vint autre semonse,
Que l'oume Diu quiérent qui gist en Roume.
[Si li depreient que la cités ne fonde;]
Quant il l'oirent, durement le redoutent.
# |
Sains Innocens iert adonc apostoiles:
A lui en vinrent et li rice et li povre,
Requisent li consel de cele cose
Qu’il ont oie, qui si les desconforte:
Ne gardent l’eure que terre les encloe.
# |
Li apostoile et li empereour,
Li uns Acaire, li autre Honoire out non.
Et tous li pules par commune raison,
Deprient Diu que consel lor en doinst
De cel saint home par qui il gariront.
# |
Trestout deprient la soie pieté
Que lor ensaint u le puissent trover.
Vint une vois qui lor a endité:
«A le maison Eufemien querés,
Car illuec est, iluec le trouverés.»
# |
Tost s’en tournérent sour dant Eufemien;
Alquant le prendent forment a blastengier:
«Iceste cose deussiez anoncier
A tout le pule qui ert desconsilliés ;
Tant l'as celé, moult i a grant pecié.»
PageV01P249
# |
II s’escondist com li hom qui ne l’ set;
Il ne l’en croient, a l’herbec sont alé.
Il va devant sa maison aprester,
Si la fait bien torcier et atorner,
A l’apostoile qui ens devait entrer;
Forment l'enquiert a tous ses menestrés,
Mais il respondent que nus d’els rien n'en set.
# |
Li apostoile et li empereour
Sient en banc et pensif et plouros,
Et entour aus li prince et li baron.
Deprient Diu que consel lor en doinst.
De cel saint home par cui il gariront.
# |
Endementiers que il ont iluec sis,
Desoivre l'ame del cors saint Alessin.
D’iluec en va tout droit em paradis;
Ja iert en transe quant la pucele vint.
Adont l’esgarde, si le vit empalir.
«Sire», dist ele, «moult vous torble li vis.»
«Bele», dist il, «car près sui de ma fin.
Grant paour ai, car près sui de morir.
Car or voi çou que onques mais ne vi;
Voi quantes mains me voelent recuellir;
Hui perirai se Dius ne me garist.
Pense del cors qu’il soit ensevelis:
L’ame ara çou que ele a deservi.»
# |
II li a dit : «Pour amour Diu, pucele,
Ma fins aproce, ne viverai mais gaires.
Sains Bonifaces, que on martir apele,
[Cil a en Rome une eglise mout bele:]
Porter m’i fai, se m’i fai metre en tere;
Quant tu morras tu i vauroies estre.»
«Au congié Diu, sire», dist la pucele.
# |
«Bele pucele», çou dist sains Alessins,
«Se or eusse tant Damediu servi,
PageV01P250
Que jou peusse les sains souner oir,
Dont fuisse liés, si seusse de fi
Que m'ame eust son liu em paradis.
Si recouvrast vers Damediu merci.»
A icele eure que li sains hom le dist,
Li saint commencent tout ensanle a ferir.
Soutient a force, la cités retentist;
N'i avoit saint, tant soit grans ne petis.
Ne sont plus cler que onques mais ne fist.
Ains que il muire les a bien cler ois.
«Bele pucele», çou dist sains Alessis,
"oiés les sains, le Damediu merci.
Ma fins aproce, dont je ne puis garir.
Qui a tous homes fait tous avoirs guerpir.
Sans les aumosnes, con ne's en puet tollir.
Vois ci mes palmes que j'ai a tout l'espi:
De Jersalem l'aportai quant jou ving;
Bien sont gardées jusqu'au jour de ma fin.
A mon cavet, quant jou iére enfouis.
M’en faites crois et as piés autresi:
Dius pensera del croistre et del tehir;
L'anoncemens d'un angle le m'a dit.
Jou ne sui mie de mout lointaing pais,
Quant mi parent seront al sevelir,
Si ert mes pére et ma mére autresi,
Et une espouse que jou ai deguerpi.»
Ot le la bele, si jeta un souspir.
«E Dius!» dist ele, «jou quic c’est mes amis!
Sire,» dist ele, «sont il bien lonc de ci?
Mandas lors tu par mes qui lor desist?»
Ne pot parler, s'est transis l'esperis:
Donc fut dolente que plus ne l'ot enquis.
Li bons serjans, qui tant jour l’ot servi.
Il va au pére, si li a tantost dit:
«Sire, dist il, mors est li pelerins.
Ma damoisele l’a fait ensevelir.»
# |
Li bons serjans, qui servi volentiers,
Il le nonça son pére Eufemien;
Souef l'apele, se li a consillié:
PageV01P251
«Sire», dist il, «mors est tes prouvendiers.
Çou m’est avis qu’il ert bons crestiens.
# |
« Mout longement ai o lui conversé,
De nule cose, certes, neu sai blasmer.
Çou m'est avis que çou est li hom Dé. »
Tous seus en est Eufemiens tornés.
Va a son fil u gist sour sen degré.
# |
Le drap sousliéve dont il estoit couverz,
Vit del saint hom le vis et cier et bel,
Et en sa main sa cartre et son seel,
Ens a escrit trestout le sien couvera.
Eufemiens veut savoir k’ele espialt.
# |
II le weut prendre, mais ne li pot tolir;
A l’apostoile revint tous esbahis:
«Sire, pour Diu, aies de moi merci.
Or ai trouvé çou que tant avons quis;
Sous mon degré gist mors uns pelerins;
Tient une cartre; mais ne li puis tolir.»
# |
Sains Innocens entendi la raison
Qui apostoile estoit a icel jour,
Et ot les sains ki sounent a un son
Dusqu’a la nuit de lor gré toute jour,
Et des sains angles vit la pourcession,
Qui portent l’ame cantant nostre signour.
De cele cartre li prist moult grans paours:
[ Vers le degré s'en corut a bandon,]
Et tous li pules esmaris environ.
Sous le degré vinrent al grabaton;
N’en apelerent, car ne sorent son non.
# |
Li apostoiles et li empereour
Devant lui vienent, getent s’a orison,
Misent lor cors en grans afflictions,
PageV01P252
Se li deprient par mout bele raison:
«Merci, merci, merci, saintismes hon,
Ne te connumes, ne ne te connisson.
# |
«Ci devant toi soumes doi peceour
Par la diu grasse clamé empereour;
C’est sa mercis qu’il nous consent l’ounour.
De cest empire soumes gouvreneour:
De ton consel soumes moult soufraitous.
# |
« Cis apostoiles doit les ames garir ;
C’est ses mestiers dont il a a servir.
Rent li la cartre par la toie merci,
Si nous dira que il treuve en escrit.
Si nous doinst Dius qu’encor puissons garir.»
# |
Li apostoiles mist sa main a la cartre;
Sains Alessins la soie li alasque,
Cil le reçut ki ert de Rome pape:
Quant il le tint, si le moustra as autres.
Illuec fist Dieus un glorious miracle,
Que de sa main s’en ala droit la cartre:
A la pucele s'en ala a la place,
Ens en son sain en son bliaut de paile:
Emprès sa car ot vestue la haire.
Doucement sert le glorious mirable;
Ele ne veut c'om ne feme ne l' sace:
Sains Innocens esperdi son coraige;
Si ot vergoigne des houmes de la place.
Et paour a ke Damedius ne l'hace.
# |
Sains Innocens quant ot la cartre overte
Et vit les letres que li sains hom ot fètes,
Ains li escape que le peust espialre:
Tout droit en va el sain de la pucele,
Sous son bliaut, entre ses deus mameles,
U ele pleure les mals et les soufraites
Que li sains hom sour le degré a traites,
Ne si ne sait c'a lui eust afaire,
PageV01P253
Mais perdre en crient le glorious celeste.
# |
Oiés, signour, con grande loiauté
Tout home doivent a lor moiller porter.
Car tel monstrance fist le jour Damedés,
Que a sa mére ne vaut la cartre aler
Ne a son pére qui l’avoit engenré;
Mais a l’espouse ki bien avait gardé
Le compaignie de son ami carnel,
La va la cartre par le plaisir de Dé;
Cil qui le virent furent espoenté.
# |
Or est remése la cartre a la pucele
Par le plaisir le glorious celestre.
Plus tost que pot le prent a la main destre;
Saint Innocent l’apostoile en apele:
«Sire», dist ele, «que porra de moi estre?
Car me consille que n’en soie mesfete.»
# |
«Bele», dist il, «buer fuisses tu ains née.
Toie est la cartre, que Dius le t’a donée,
Qui que toi plaist doit estre delivrée.»
«Sire», dist ele, «jou sui moult esgarée.
Faire quit cose dont li cors sains me hée.»
Ele esgarda les clers de la contrée.
A saint Ambroise a la cartre livrée.
# |
Cil ert evesques et canceliers saint Pére
Il list la letre ; li autre l’escoutérent.
Le non lor dist del pére et de la mére,
Et de celi que il ot espousée,
Et si lor dist de ques parais il ére :
Et la moitié de l’anel ont trouvée,
Dedens la cartre trés bien envolepée,
Dont la moitié li ot recommandée.
Ele l'ot bien estoie et gardée;
Il li demande; ele l’a aprestée;
Il les assamble, si se sont acordées.
Dist l'apostoiles : «Ceste ensegne est prouvée.»
«Sire», dist ele, «que l' m’aviés tant celée?
PageV01P254
Si les eusse rendues et moustrées.»
Grans fu li diex, a terre ciet pasmée.
# |
Et si lor dist com s’enfui par mer,
Con s’en ala en Ausis la cité,
Et com l'ymaige fist Dius pour lui parler,
Et pour l’ounor dont le vaut emcombrer
S’en rafui a Roume la cité;
Sen bon serjant n'i vaut mie oublier.
Que miels l'en soit qui tant jour l'a gardé.
# |
Quant ot li pére ke on troeve en la cartre,
A ses dous mains desront sa blance barbe:
«E fiels», dist il, «con dolorous mesaige!
Jou aesmoie ke tu vis repairasses,
Pour Diu merci, si me reconfortasses.»
# |
A haute vois prist li pére a crier:
«E fius, dist il, quels dels m’est demorés!
Con male garde ai fait sous mon degré!
Et jou peciére, com par sui avulés!
Tant l’ai veu c’ains ne l' soi aviser.
# |
« Fiels Alessis, de ta dolante mére!
Tante dolour a pour toi endurée
Et tant grant fain et tant soif trespassée,
Et tantes larmes pour le tien cors plourées !
Cis dels l’ara sempres par acorée
Qui est moult grans : anqui sera tuée.
# |
«Fils, qui seront mes grandes iretés,
Mes larges teres dont jou avoie assés,
Mi grant palais en Rome la cité?
Par toie amour m’en iére mout penés ;
Se tu vesquisse, t’en fusses hounerés.
# |
«Blanc ai le cief et le barbe kenue,
Mes grans onors avoie retenues;
Je vous servoie, mais vous n’en aviés cure.
PageV01P255
Si grans dolors m’est hui cest jour venue!
Fils, la toie ame soit el ciel absolue!
# |
«A tel dolour et a si grant poverte,
Fils, t’es deduis par alienes teres;
Et de cest bien qui tous deust tiens estre
Poi em presis en la toie herberge:
Se Diu pleust, sire en deussiés estre.
# |
Toi couvenist lance et escu porter,
Espée çaindre comme tes autres pers,
Et grant maisnie ricement conreer,
Le gonfanon l’empereour porter;
Si fist tes pére et tous tes parentés.»
# |
De la dolour que demenoit li pére,
Grans fu la noise: si l’entroi sa mére.
La vint corant comme feme dervée,
Batant ses palmes, corant, escavelée.
Voit mort son fil: a terre ciet pasmée.
# |
Qui dont le vit son grant duel demener,
Son pis debatre et son cors degeter,
Ses crins derompre, son vis desmaiseler,
Et son mort fil detraire et acoler,
N’ot si dur cuer ne l’estuece plourer.
# |
Desront ses crins, si debat sa poitrine,
A grant duel met la soie car meisme:
«E fiex», dist ele, «com m’eus enhaïe!
Et jou caitive, com par sui avulie:
Ne l’ recounui, onques tant le veisse.»
# |
Pleure des oels, si escrie a haus cris;
Puis se regrete : « Mar te portai, biaus fils.
Et de ta mére com n’en eus mercis?
Pour toi veir desiroie a morir,
Çou fu mervelle que pitiés ne t’em prist.
# |
«Fils Alessins, de la toie car tenre!
PageV01P256
[A quel dolour as deduit ta jovente!
Pour quoi m’ fuis? ja t’ portai en mon ventre;
Et Dius le set que tote sui dolente ;
Ja mais n’ier liée pour home ne pour femme.
# |
Fils Alessis, mout eus dur corage!]
Si adosas tout ton gentil lignaige!
Se une fois a moi seule parlasses,
Ta lasse mére si le reconfortasses
Qui ’st si dolante, biaus fiels, buer i alasses.
# |
«E lasse mére! comme fort aventure,
Que ci voi morte toute ma noureture!
Ma longe atente a quel duel m’est venue!
Que porrai faire, dolante créature?
[Ce poise moi que li miens cors tant dure.]
# |
«Ains que t’eusse, en fui si desirouse;
Quant tu fu nés, s’en fui issi joiose!
Çou poise moi ke ma fins tant demore.
# |
«Signor de Rome, pour l’amor Diu, merci.
Aidiés m’ a plaindre le duel de mon ami.
Grans est li dels qui sor moi est vertis.
Ne puis tant faire que mon cuer en sasi:
Il n’est mervelle, n’ai mais fille ne fil.»
# |
Entre le duel del pére et de le mére,
Vint la pucele qui il ot espousée,
Que il laissa en la maison son pére ;
«Sire,» dist ele, «com longe demourée!
Atendu t’ai en la maison ton pére;
Tu m’i laissas dolante et esgarée.
# |
«Sire Alessis, tant jour t’ai desiré,
Et tantes larmes pour le tien cors plouré.
Et tot pour bien et nient tout pour el.»
PageV01P257
# |
«Sire Alessins, de ta jouvente bele!
Con sui dolante quant toi porrira terre!
E gentiex hom, si dolante puis estre!
Jou atendoie de toi bones nouveles,
Et or les voi dolerouses et pemes.
# |
«Se te seusse ça defors le degré
U as geu de longe enfremeté,
Nus hom qui vive ne m’en peust tourner,
Qu’ensamble toi ne m’esteust poser.
# |
«Or par sui veve, sire,» dist la pucele:
«Jamais leece n’arai, car ne puet estre;
N’a carnel houme n’arai jamais a faire.
[Diu servirai, le roi qui tout governe :]
Ne me faura s’il voit ke jou le serve.»
# |
Tant i plourérent et li pére et li mére
Et la pucele, que trestout s'i lassérent.
Endementiers le saint cors conreérent
[Tot cil seinor et bel l’acoustumérent:
Felix tot cil qui par foi l’honerérent!]
# |
«Signour, que faites?» çou dist li apostoles,
«Que vous ajue cil deus ne ciste noise?
[Qui que soit doels a nostre oes est-il joie,]
Car par celui arons boine victore. »
# |
Trestout le prendent qui porrent avenir;
Cantant emportent le cors saint Alessin.
N’estuet semonre cels qui l’orent oi.
Tout i acorent, et li enfant petit,
Et tout li prient que d’aus tous ait merci.
# |
Si s’en esmurent toute la gens de Roume;
Plus tost i vient qui plus tost i puet courre:
Parmi ces rues en vinrent si grans routes,
Ne quens ne rois n’i puet faire enterotes,
Ne cel saint cors ne puent porter outre.
PageV01P258
Entr’ els em prisent li signor a parler:
«Grans est la presse, nous n’i porrons passer;
Pour cel saint cors que Diex nous a presté
Liés est li pules qui tant l’a desiré:
Tant en i vienent, c’om nes en puet torner.»
# |
Respondent cil qui le regne baillissent:
«Estés, signor, nous en querons mecine:
De nos avoirs faisons grans departies
La gent menue qui l’aumosne desirent;
S’or nous font presse, si en iermes delivre.»
# |
De lor avoir prisent l’or et l’argent:
Si l’ont geté devant le povre gent;
Pour çou quidiérent avoir descombrement.
Que lor ajue ? il n’en veulent nient:
A cel saint cors ont torné lor talent.
# |
A une vois crient la gens menue:
«De cest avoir, certes, n'avons nous cure,
Mais del saint cors que il nous face ajue:
Car par celui nous iert vie rendue.»
# |
Sours, n’avulés, ne contrais, ne lepreus,
Ne crestiens qui tant soit languereus,
Ensorque tout nus hom palasinex,
Icil n’i vint qui ’n alast malendos,
Ne nus n’i vient qui report sa dolour.
# |
N’i vient enfers de cele enfremeté
A cel saint cors, lues ne soit rasenés;
Auquant i vienent, auquant s’i font porter.
Si vraie espesse lor a Dius demoustré,
Qui vient plorant, cantant l’en fait aler.
# |
Li doi signour qui le regne gouvernent,
Quant il en virent les vertus si apertes,
Alquant le prendent et li auquant le servent;
Auques par proi et auques par poeste
PageV01P259
Passent avant, si desrompent la presse.
1305 Sains Bonifiaces que on martire apele
Avoit en Roume une eglise mout bele;
Illuec portérent saint Alessin acertes.
# |
La gent de Roume qui tant l’ont desiré
Set jours le tinrent sor terre a poesté.
Grans fu la feste, ne l’estuet demander.
De toutes pars l’ont si avirouné,
Sous ciel n’a home qui i puist habiter.
# |
El setme jour fu faite sa herbege .
A cel saint cors, a la gemme celestre.
Traient s’en sus, si alasque la presse.
Vellent u non, le laissent metre en terre.
# |
A encensiers, a oires camdelabres,
Clerc se revestent en capes et en aubes.
Cel saint cors metent en un sarcu de marbre.
# |
D’or et d’argent fu li sarcus parés
U cel saint cors veulent metre et poser;
Si l’enfouirent a vive poesté.
Pleure li pules de Rome la cité,
So siés n’a home qui ’s puist reconforter.
# |
Ore avons dire du pére et de la mére
Et de l’espouse comme il le regretérent.
Le jour i ot cinc cens larmes plorées.
# |
Quant sour la tere n’en porent mais tenir,
Vellent u non, le laissent enfouir.
Prendent congié au cors saint Alessis:
«Biaus sire pére, aies de nous merci,
A ton signour nous soies boins plaidis.»
# |
Va s’ent li pules ; et li pére et li mére
Et la pucele onques ne desevrérent.
Ensamble furent dusqu’a Deu en alérent.
PageV01P260
Lor compaignie est boine et hounerée;
Pour cel saint home ont lor ames sauvées.
# |
Com bones oevres, Diex, et com bon service
Fist cil sains hom en ceste mortel vie!
Or en est s’ame de gloire raemplie:
Quant que veut a, n’en est un point a dire,
Ensorquetout et si voit Diu meisme
# |
[Sains Alexis est el ciel sans doutance
Ensemble o Dieu en la compaigne as angres]
Et la pucele dont il se fist estrange ;
Or sont privé: ensamble sont lor âmes.
Or sont en glore sans nule repentance:
Illuec conversent, et si lisent lor salmes:
Ne vous sai dire comme lor joie est grande.
# |
Elas ! caitis ! com somes encombré!
Que porrons dire? trop sommes apressé:
Pour nos peciés sommes tout avulé.
La droite voie nous font entroublier:
Par cel saint home devoumes ralumer.
# |
Tenons, signour, cel saint home en memoire,
Çou li prions de tous mals nous asoille.
*** END