ChaceP.txt

#META#  TextURI          :: ChaceP
#META#  DEAF
#META#  TL
#META#  FEW
#META#  ARLIMA           :: https://www.arlima.net/ad/chace_dou_cerf.html
#META#  Author
#META#  AuthorBorn
#META#	AuthorBornAmb
#META#  AuthorDied
#META#	AuthorDiedAmb
#META#	AuthorFl1
#META#	AuthorFl2
#META#  TextTitle        :: La Chace dou Serf
#META#  TextSubtitle
#META#  TextVols
#META#  TextSubj         :: chasse
#META#	TextDom          :: didactique
#META#	Translation      :: false
#META#	Collection
#META#	CollectionNo
#META#  TextDescARL      :: 324 vers octosyllabiques à rimes plates
#META#  TextDescVers
#META#  TextDateARL      :: Milieu du XIIIe siècle
#META#  TextDateAdj      :: m13
#META#	TextDateMin
#META#	TextDateMax
#META#  EdEditor         :: Pichon, Jérôme (?)
#META#  EdPlace          :: Paris
#META#  EdPublisher      :: Lacrampe
#META#  EdVol
#META#  EdYear           :: 1840
#META#  EdPages
#META#  MsBase
#META#  MsNum            :: 5
#META#	MsDateARL
#META#	MsDateAdj
#META#	Form             :: v
#META#	Complete         :: true
#META#	NoWords          :: 3054
#META#	NoLines          :: 324
#META#	DialAuth
#META#	DialScribe
#META#  ScanURL          :: https://gallica.bnf.fr/ark:/12148/bpt6k6344042m
#META#  ScanURIOther
#META#  ArkID            :: ark:/12148/bpt6k6344042m
#META#  LccnID
#META#  OclcID
#META#  WebAuthor        :: David Joseph Wrisley
#META#  ORCIDWebAuthor   :: orcid.org/0000-0002-0355-1487
#META#  WebReviewer      ::
#META#  ORCIDReviewer    ::
#META#  MiscInfo
#META#  CCLicense        :: CC BY-NC-SA 4.0 International

PageV01P011
§ LA CHACE DOU CER
Si sont aucun qui s’antremettent
De rimer, et grant peine i mettent:
Li un le font pour miex valoir,
Et li autre pour miex avoir.
D'amors se mellent li auquant:
Maint revont au tournoiement
Chevalier pour aus avancier:
L’uns vuet trere, l’autre lancier.
En plusors choses se deduit.
Loiaus cuers, sa foiz le conduit.
Tex i a qui aiment faucons
Espriviers et esmerillons,
Mes tex les porte sor son poing
Qui au cuer en a pou de soing.
Cil qui de deduit s’entremet
Se il n’aime t ce que il i met
Puet pou profitier et valoir.
S’il estoit quil vousist savoir
D’un deduit qui les autres passe,
(Qui bien aprent petit se lasse)
PageV01P012
Je vous vuel bien faire a entendre.
Nuns n'enpire de bien apendre.
Li deduiz est si souverains,
Qui n’est rois, ne cuens, ne Gaavains,
Sil estoit vis et bien l’amoit
Qui plus honorez n’en seroit
De tous ciaus qui s'i entendoient.
# |
Biau sire se tuit le servoient
Vaudroit-il mains quil ne fet ore?
# |
Certes ains vaudroit miex encore,
Biaus dous amis, bien le sachiez.
# |
Dont vous pri-je que vous voilliez
Dire devant touz quex il est.
# |
Certes, biaux douz amis, ce est
Deduiz qu’on a de chiens courans.
# |
Sire, moult seroie joians
S’il vous plesoit à deviser
Comment il en convient ouvrer.
Moult volantierz l’escouteroie
Se vous voliez assantir
A moi dire a coi ils courront,
Et comment il cognoisteront
Quel beste je vourai chascier.
PageV01P013
Je vous au auroie plus chier
Et vous au voudroie servir.
# |
Et je n’en quier jà mentir,
Car j’en sai bien la vérité.
Quand il auront l’iver esté
Au sangler, si les an retrai
Devant karesme, et si les lai
Bien sejorner et aasier.
Et se tu trueves biau chacier
Enz el karesme, et sec, et dur,
Au lièvre, par aucun éur,
Si gart que ni soit refusez,
Car il en auront millors nez,
Et l'alaine eu amenderont.
Et quant li arbre floriront,
Que li prins tens aprochera,
Lors pren tes chiens, et si t’en va
Là où tu quideras trouver
Miex le cerf, pour aus encharner
Et lor aie, a ton pooir,
Du cerf a prendre et a avoir
Et la cuiriée lor en fai
Mengier. Ancor je te dirai
Comment il te convient ouvrer.
Il te convient querre et trouver
Un lieu à corre bien séant
Sanz change, et mettre un peine grant
Que tu i puisses assener;
Et puis fai tes chéaus mener
PageV01P014
La où tu cuides, par avis,
Que li cerf doie estre honniz,
Et puis trai de ten liemier,
Et fai tes millors chiens chacier
A force, car il est resons.
Et sés tu que nous te disons,
Que se tu pues que tuit ti chien
Soient au prendre, a ce te tien.
Se tu vues aprendre et savoir
Dou cerf a conoistre et véoir,
Si entens bien: quant les fumées
Ne seront ancor pas formées
Par le pié bien cognoisteras
À quel cerf corre tu devras:
Grosse esponde et large talon.
Ce ne doit refuser nuns hom:
Sil a gros et larges les os,
Se tu t’en pars tu seras fos.
Mais je te vuel faire savoir
S'a dont pues jone cerf avoir,
Que tu le chasces j'el te di,
Car de l’iver sont afoibli
Li jone plus que vielle assez:
Et sitost comme pris aurez
Quatre cers contre la seson,
C'ert assez pour afaitoison.
Et puis à ton seigneur si mande
Que sa volanté te commande,
Et le leu te fasce savoir
Ou il voudra deduit avoir
PageV01P015
Des chiens que tu as afaitiez
S’ensi fetes, bien le sachiez,
Por bon vénéour vous tendra.
# |
Biau sire, quant il avendra
Que mes sires m’aura mandé,
Et aurai fait ce qu'il commandé
M’a, nez apaié se tendra,
Et lors primes commencera
Li tans qu’on claime cervoisons:
Apris m’avez d’afaitoisons,
Or vous pri-je, se vous volés,
Et il vous plest, que m’aprenés
Com faitement ovrer gie doi,
Eu la saison. De ce vous proi,
Car grant talant ai de l’oïr:
Don ne puet il mie faillir
Que vous n’en sachiez par reson.
# |
Quant ce venra en la seson
Que vo sires voura chacier,
De tant vous vuel bien chastier
Que ne soiez pas pereceus,
Mes de matin lever soigneuz.
Et si prenez un liemier,	.
Car il vous aura bien mestier,
Et entor le fort le traiés:
Car li cers, seurs en soies.
Se relieve et va ramboscher
Pour ce, devez querre et tracier
PageV01P016
Entor le fort, pour ancontrer.
Et si vous devez bien garder
De quele beste ce sera
Que voz chiens renconterra,
Car bien s'i convient aviser.
# |
Sire je i pouroie muser
Longuement, ainz que j’el séusse
Ne que cognoistre m’i péusse,
Se vous ne me dites comment.
# |
Frere je t’ai apris avant
Dou pié, et parce le sauras:
Et saches que il ne doit pas
Longuement aler qu’on n’el truit
Des fumées qui point ni nuit
A conoistre, ansois i vaut moult
Car par ce s'i cognoissent tuit
Cil qui s’entendent a deduit:
Mes tex en demaine grand bruit,
Sachiez que petit s'i conoist.
# |
Or vous pri-je, se ne vous poist,
Que me dites que je ferai
Quant les fumées trouverai,
Car je ne sai pas tot encor.
# |
Tu les metras dedans ton cor,
Et de l’erbe l’estouperas:
Et puis jusques au fort sieuras,
Car là ne se puet il celer,
PageV01P017
Et il convient le bos porter
As cornes qui ont grand refrait.
Et quant tu auras tout ce fait,
Et tu auras le bos trouvé
Qu il aura brisié et porté
L’un sur l'autre, si t’en retrai,
Et sagement tes fretes fai,
Si que tu puisses rassener.
Et puis si t'en dois retorner
A ton seignour. Tu dois savoir
Ou tu li auras, dit le soir,
Qu’il viegne et que li chien seront;
Et si te convendra adont
Fere brisiés au raler,
Si que tu puisses racener
Et mener ton seignor tot droit,
Car tot issi faire le doit
Li venerres, bien l’entendez:
Et quant à lui venus serez
Si li monterrez les fumées
Que vous aurés aportées;
Et s’il avient qu'il vous demant
Que vous li faites jugement,
Et dites li quex valent miex;
Bien devez estre si souciex
Que par vous li soient loueez
Grosses et fermes et serréez.
Et celes en torches pesans
Ne refusent nul cognoissant.
Et se le jone cerf avez
PageV01P018
Bien est reson que vous monstrez
Les fumées qui vaines sont.
Et puis si vous dira adont
Vostre sire sa volanté.
Mais je vous di, par vérité,
Que li viex vaut miex en cel tens
Porcequ'il est gras et pesans,
Et à chacier c’est or tot cler.
Se tu vois ton seignor monter
Sur son cheval, si monte errant
Sanz faire nul delaiement;
Et puis si pren ton liemier,
Car tu ne le dois pas laissier,
Et t'en reva par tes brisiés
Aus fretes que tu as lessiés.
Et quant tu seras aprochiés
Del leu ou li cers est embochiez,
Fai tenir ton chien et descent.
Et puis si sui tot belement
Et, se tes sires vuet aler
Avec toi, pour veoir trouver,
Si met paine que il en ait
Veu ansi comme tu as fait,
Car li deduis l'en plera miex.
Et si ne soiez mie eschiex
De lui monstrer ce que tu vois,
Mes soffle en terre et quier as dois
Là ou tu vois que marchié a
Pour descouvrir, miex en parra
Et li esponde et li talons
PageV01P019
Et li os: pour ce le jugons.
Et des fumées autresi
Dois tu bien trouver, ce te di.
Et puis iuppe ou corne un lonc mot:
Chaucuns en a joie qui l'ot,
Nes li chien joie en auront,
Et li vallet les amenront
Plus près, pour ce qu’auras iuppé.
Et lors doivent estre escrié
Pour ce que il ne fascent mal
Et quil se tignent en estal
De faire noise, au mains qu’on puet,
Car tot issi faire l’estuet.
Et quant tu aparcevras
Au liemier que tu manras
Quil ert de plus grand volanté
De sieure que il n’a esté,
Et, par les fuies, que il ront
Assez la terre plus parfont,
Et le pié verrez; ce sachiez,
Et par le lit vous cognoissiez,
Ausi, c’est ce qui moult i vaut;
Mes de mon parler ne me chaut:
Passe le lit, tant que drecié
L'aiez; et puis fai qu’atachié
Aiez ton chien a un rainsel
Et puis, si corneras apel:
Trois lons mos pour tes chiens avoir;
Et lors vandront a lor pooirz
Puis met la main au descoupler
PageV01P020
Et lesse les millors aler
Avant, et çaus que miex crevas
Et puis tantost si monteras.	.
Biau parole au chiens, ce te di,
Tant qu’il l’aient bien acoilli:
Et puis pence de bien chacier
Du cor, car il i a mestier,
Et tes trois menées feras
Trestot au mieus que tu porras;
Parole a aus, et si met paine,
Haut et clerc, à longue alaine,
Et sui tost, et inellement,
Tes chiens, et viguereusement:
Ne redoute ne mont, ne val,
Ne fort bois qui te fasce mal;
Que en cheval soiez cornans,
Et sieu la menée touz tens,
El chasce, et corne cler et haut,
Que retantisse li bos haut,
Et les valées en bondissent,
Car li chien moult s’en esbaudissent.
Et des rainsiaus brise en courant
Qu’en la menée vas gitant,
Et aus voies passer ausi.
Qui refuit volantiers sur li
S'ariere retorner te dots
Toute la menée; c’est drois.
A la requeste deux menées
Doivent estre par toi cornées.
A l'estortoire dois monstrer
PageV01P021
As chiens que véu as passer
Le cerf, plus joli en seront:
Et fiert ta huese et bat et ront
Se tu os c’uns chien le destorne
De ceus a qui tes cuers s’atorne
Et que tu crois, si hue sus
Les autres chiens, tant com pues plus;
Et les fai chacier et si chasce
De cor, de bouche; et se il passe
El leu ou de toi soit véuz
Quatre lons mos et chasse sus
Dois corner: et cil qui l'oiront
Treront à toi et amenront
Les chiens a trestot lor pooir,
Et joie auront: sachés de voir.
Et puis quant il seront passé
Si corne com’ j’ai devisé.
Et sieu tot adès la menée:
Et gaite bien que obliée
Ni soit ne brisiée ne fraite.
Et s’il t’a autre ruse faite
Si fai si com’ de la premiere,
Tele en doit estre la meniere
Comme j’ai devant ensaignié.
Se tu chasses de souz-loignié
Onques pour ce ne t’esbaubis
Ne à tes chiens ne fai jà pis,
Ne ne coite plus, mes soigneus
Soies de biau parler a eus.
Il fera chaut et sec et dur;
PageV01P022
Et li cers n'iert mie asséur
S’il sieut le descouvert: si dois
Trere au couvert, car il est drois:
Li chien miex en asentiront.
S’il fuit à l'iaue, trei au mont
Et aval, il ne puet faillir
Quil ne truissent à assentir.
Si tret à flache, ou à vivier,
Ou à marchais, ne dois lessier
A trere. Ancor a ce t’atorne,
Se tu oz c’uns chiens le destorne,
À ciaus qui ne l’auront oï
Dois parler, ce saches de fi,
Et lor dois dire assez, non po,
Ta ta ta ta ta ho ta ho
Et si tost que sui aura
Tant que plus fuir ne pora
Et qu’il se fera abaier,
Quatre lons mos et sus chacier
Dois corner, ce saches de voir,
Pour chiens et pour vallès avoir,
Car, s'il le truevent en estant,
Il en seront tuit plus joiant;
Et li cheal l’abaieront
Et, par droit, en amenderont.
Lors li dois les jarrès couper;
Ainsi en vaudroie je ouvrer,
Se je m’en melloie, sachiez.
Le cerf jut par les chiens sachiez:
Et, quant abatu le verriez,
PageV01P023
D’un coutelet l'esmouelez
Entre les cornes et le col.
Et de tant t’apren et escol
Que lors dois tu prise corner:
Et puis dois mener abuvrer
Les chiens qui en auront mestier.
Et ce te vuel bien accointier
Qu’a vallès fasses retorner
Ton cerf, puis le fai encorner;
Et lors dois sachier ton coutel,
Les coulles lieve bien et bel:
Puis va a la teste, or entent,
Et de louc en louc le porfent,
Et puis si le dois escorchier,
Les neus n’i dois mie laissier,
Et s'il avenoit que aucuns
Passast deseure, c’est communs
Que il doit la buffe avoir
Sans pardon, ce sachiez pour voir:
Et les espaules autresi
Dois lever après, ce te di;
La souz gorge après en levez,
L’erbière et le josier coupez,
Et l’erbière devez nouer,
Ce vous vuel aprendre et loer,
Puis lieve la hampe en sivant,
Le foie de la pause prent,
S’el baille a tel qui n’oblist mie
Que il ni lasce la folie,
Et puis en sache fors la pance
PageV01P024
Et commande, sans délaiance,
Aus vallès que la mule en ostent
Et avec les daintiez l’emportent.
Met la bouele sus la teste
Car li chien eu feront grant feste,
Et puis en oste la froissure
Mais garde, par nulle avanture,
Que le jardel n’i obliez:
Es daintiez mettre le devez.
Puis l’en doit le nomble lever,
Les cuisses n’i dois oublier,
De l’eschine deux neus i ait,
La queue plus bele s’en fait:
Et puis en lieve les costés,
L’eschine mie n'i obliés,
La queue dois, à ton pooir,
Bele lever: ce dois savoir.
N’oublie pas à enciser
Les jointes devant et derrier:
L’os corbin mie n’obliés,
Haut sur un aubre le metez;
Et le cuer donnez aus mesiaus
Car ce doit estre lor joiaus.
L’os dou cuer n’obliez vous pas,
A dame encainte le donras.
# |
Lors dois ta venoison trousser:
La teste et le col acopler
Emsamble, pour voir le te di:
PageV01P025
Et les deux espaules ausi
Emsamble, et puis les deux costéz
Sus un autre cheval troussez.
La hampe et la queue sera
Ensemble, bien i avenra;
Et les deux hausses d’autre part.
# |
Lors dois haster, se il est tart,
De faire erra ment la cuirié.
Puis le cuevre tant que chergié
Soit la venoison et trossée.
Puis soit la bouele ostée
En sus, car il en est mestier,
Et deslie les levriers.
Fai chascun une verge prendre
Pour les chiens de hustin deffendre
Et les fait touz mangier emsamble,
Et, ausi tost que il te samble
Que il auront mangié assez,
Si soies moult bien avisez:
A celi qui tient ta bouele
Dois-tu crier: apele: apele.
Le cuir trouse derriere toi.
N’est pas mervoille se t’as soi:
Se li vins si est en barils
Bien est resons qu'il soit béus,
Et, si tost que béu aurez,
Dessus les chevax monterez
Et lors devez prise corner,
Ce n'i doit on mie oblier.
PageV01P026
Et, quant de l'ostel seroiz près,
Si soiez de corner engrés
Deux menées; cil qui t'oïront
Et lie et joiant en seront.
# |
Mes je te vuel faire asavoir
Quex drois tu doiz dou cerf avoir
Li cuirs est tiens et li nomblès
Et les espaules. Li vallet
En ont le col; c'est lor droiture:
Mais tu dois savoir, par nature,
Que cil droit te furent lessié
Pour ce qu’il fussent emploié
Cortoisement et départi:
Que garde n’avigne par ti
Que nuns hom t'en puist à blamer
Par la defaute d’en donner.
# |
Or t'ai a pris et ansaignié:
Se le retienz, à emploié
Tieng bien le travail que j’ai fait.
# |
Sire vous m’avez tant retrait
De biens que touz jors en serai
Vostres, et servir vous vourai
A mon pooir, bien le sachiez.
Mais je vous pri que me diiés
Se je doi tot adès ouvrer
PageV01P027
Ensi, pour dou cerf encontrer;
Que deviser oï vous ai.
# |
Biaus doux amis je vous dirai:
Si tost com vous aurez trouvées
Les menieres dont les fumées
Seront changiez, c’est tot voirz,
Lors iront les cers as fréoirz.
Et si ert pres de la Magdelaine,
Sachiez que c’est chose certaine.
Par le pié et au bois porter
Ti dois tu, touz tans, raviser,
Et au froier cognoisteras
Dou cerf, quant tu le trouveras:
Car au plus gros froïr se froie
Et avient plus haut, c’est la vraie
Lors dois t’estortoire peler,
Et plus matin t’estuet lever.
Et t’an dois aler as clarriaus
Et as landes, soies iniaus.
Veir muser i devras
Et as faus en conoisteras
Et as solas, car sa pianiere
Est de burnir a charbonnière.
Dou liemier drecier le dois,
Saches que c’est resons et droiz.
Que ainsi com j’ai dit devant
Il affiert et c'est avenant.
Et dont venront chien et vallet:
Au descoupler grant paine met
PageV01P028
Et les cueure inellement
Et tost et viguereusement
Et chasce en autel meniere
Com je t’ai dit par ça darriere.
# |
Quant li cers as bices aront
Alé, bien s’en apercevront
Li millor chien et li plus haut
Chacier ne vauront, ce ne faut,
Ainz compisseront la menée;
Sachiez que c’est chose provée,
Dusqu'atant que à chaiffe sera;
Et lors chaucuns le chacera
Mes les jones le chaceront
Et plus volantierz i courront
Se tu pars les chiens; or entent:
Une menée seulement
Dois chacier en toutes saisons:
C'est véritez nous te disons.
Fai tes vallès des ars porter,
Car nuns ne doit le cerf tuer
D’espée, puisqu'il est froiez:
De loing vous lo que le traiez.
Tot adès quant vous chacerez
Fraites et brisiées lairez
Ansi que je vous ai apris:
Assez tost est li tans failliz
Que on ne devra plus chacier
Le cerf: ce te vuel acointier.
PageV01P029
Or retien bien ce que dit t’ai
Et saches bien que eslit ai
Les paroles à mon pooir
Qui au deduit doivent valoir;
Mes jà, pour ce, nou laisseras
A demander, quant tu verras
Home qui te puist ensaignier:
De li te lo à acointier
Pour ce que l'en oies parler.
Touz gentil homes vuel loer
Et pri qu’il i vuelleut entendre,
Car l'en y puet moult de bien prendre.
Nuns ne les aime qui n’en soit
Mieudres, se il fet ce qu’il doit.
§ Explicit la chasce dou cer.